VOV4.K’ho- Mho mang ngai 01/4, tàm Hà Nội, Cơldŭ lơh broă Quốc hội bơyai lơh pơrjum tơn jơh tơngai lơh broă Quốc hội khoá XIV bơh mpồl Nghị sĩ gĭt gơ̆p lơh bơyô bal đah Việt Nam mờ Nga. Đơs tàm dơ̆ pơrjum, ồng Phan Xuân Dũng, Kuang ătbồ Mpồl Nghị sĩ gĭt gơ̆p lơh bơyô bal đah Việt Nam mờ Nga, Kuang ătbồ Ủy ban Khoa học, Công nghệ mờ Môi trường Quốc hội dê pà gĭt, tàm tơngai lơh kơnòl broă Quốc hội khoá XIV, bal mờ ală broă lơh lơh broă mờ lơgar ndai bơh Đảng, Dà lơgar dê, broă lơh bơh Mpồl Nghị sĩ gĭt gơ̆p lơh bơyô bal đah Việt Nam mờ Nga kung neh pơgồp bơnah ờ dùl êt tàm broă tơnguh bơta gĭt gơ̆p niam bơnĕ đah 2 lơgar, ngui niam gơnoar broă bơh gah lơh broă mờ lơgar ndai nghị viện dê đơs bal mờ Nghị sĩ gĭt gơ̆p lơh bơyô bal đơs is.

Đại sứ lơgar Nga tàm Việt Nam kung đơs nền, broă lơh bơh Mpồl Nghị sĩ gĭt gơ̆p lơh bơyô bal đah Việt Nam mờ Nga tàm tơngai lài neh tă pơgồp jơnau nùs, tơnguh bơta lơh broă bal đah Việt Nam mờ Nga tàm ală gah broă lơh krơi is.

Cau mblàng Lơ Mu K’Yến