VOV4.K’ho - Drim òr (26/05), Bộ Giáo dục mờ Đào tạo bơyai lơh pơrjum pờ tơlĭk tàm internet mờ 63 càr, ƀòn dờng bè broă bơyai lơh pơrlòng jơh bơsram cấp 3 nam 2021.

Bộ Giáo dục mờ Đào tạo đơs, gam lơh ngan bơyai lơh dơ̆ pơrlòng do, mơya pal geh ờ do ờ dă mờ nền nòn geh ai lài ngan. Jăt Bộ Giáo dục mờ Đào tạo đơs, gơwèt mờ kơnòm bơsram ơdŭ 12, tŭ do neh geh 18 nă cau F0, 394 nă cau F1, mìng tàm 4 càr Bắc Giang, Bắc Ninh, Hà Nam mờ Điện Biên. Mơya, tài neh geh broă mờng chài bơh broă bơyai lơh pơrlòng tàm nam lài den tàng Bộ gam lơh ngan bơyai lơh dơ̆ pơrlòng do.

Tŭ do Bộ neh bơ̆t bơtàu ală broă lơh nàng sơndră mờ ală bơta gơtìp krơi is. Bộ Giáo dục mờ Đào tạo kung sồr ală càr, ƀòn dờng bơ̆t bơtàu ală broă lơh mùl màl bơh dơ̆ pơrlòng tàm bơta kòp Covid-19 gơtìp.

Cau mblàng Ndong Brawl