VOV4.K’ho- Tàm uă nam do, Pôs đồng ling sền gàr tiah nhàr lơgar Hồ Le (Gah đơng lam Mpồl ling sền gàr tiah nhàr lơgar càr Kon Tum) neh lơh pràn broă lơh hòi jà làng bol, lơh jat niam gùng dà broă lơh bơh Đảng, adat boh lam bơh Dà lơgar dê, bơh hơ̆, pơgồp bơnah gàr niam bơta sền gàr bơta lơngap lơngai chính trị, rơndap tap sèng, ờdo ờdă mpồl bơtiàn tàm tiah nhàr lơgar,

Ù tiah Pôs đồng ling sền gàr tiah nhàr lơgar Hồ Le atbồ geh 8 thôn bơh 2 xã Ia Đal mờ Ia Tơi, kơnhoàl Ia H’Drai, càr Kon Tum, mờ 717 hìu bơnhă, 2 rơbô 245 nă cau, uă ngan là công nhân ală tiah lơh broă sa gơwèt sơnĕ 716 (Binh đoàn 15) mờ Công ty Cổ phần Đầu tư mờ Bơtàu tơnguh Duy Tân. Tàm 17 nam do, kờp bơh ngai crơng gơs Pôs đồng tus tŭ d0, bơdìh mờ kơnòl broă lòt sền, sền gròi tiah nhàr lơgar, Pôs đồng sùm lơh niam broă lơh hòi jà làng bol.

Kuơ màng, bơh bồ nam 2020 tus tŭ do, Pôs đồng neh ai mpồl ling lơh kơnòl broă lòt sền, sền gròi, kơryan pơgồp bal mờ rcang sơndră kòp Covid-19, gàr niam broă sền gàr tiah nhàr lơgar, ù tiah do dê. Tàm hơ̆, neh bơyai lơh mờr 150 dơ̆ lòt sền ntrờn làm bă tiah sền gàr tiah nhàr lơgar, rcang sơndră kòp Covid-19. Mơkung gàr niam kơrnoat tàm tiah nhàr lơgar, di tŭ sền gŏ, lơh glài ală cau mŭt, lik tàm lơgar tìs mờ kơrnoat boh lam; bơyai lơh toah wàs rŭ rơm tàm gùng lòt tus jrong tiah nhàr lơgar bơh dà lơgar dê mờ gùng lòt sền tiah nhàr lơgar geh 19 kơi sồ; gàr sùm 3 mpồl lơh broă tàm ù tiah do dê pơgồp bal mờ gơnoar atbồ, di tŭ bơsong ală broă gơlik geh tàm tiah Pôs đồng dê drơng broă.

Pôs đồng ling sền gàr tiah nhàr lơgar Hồ Le kham sơm kòp, pà sơnơm ờ sa priă ai làng bol xã Ia Đal, kơnhoàl Ia H’Drai, càr Kon Tum in

Tàm broă lơh hòi jà làng bol, Pôs đồng neh cribơyai bal mờ kấp ủy, gơnoar atbồ 2 xã Ia Đal mờ Ia Tơi, kơnhàl Ia H’Drai lơh ngan lơh kơ̆ kơl jap mpồl Kuang bàng xã, thôn lơh geh cồng nha, cribơyai bơto bơtê 6 nă đoàn viên jak mŭt tàm mpồl Đảng; pơgồp bal mờ UBND xã Ia Đal, Binh đoàn 15 bơyai lơh tă pơgồp dong kờl Kes priă “Ngai tài cau rƀah” càr  dê geh mờr 30 tơlak đong; lùp còp pơn dờm pơnđiang 24 nă Kuang bàng, cau ling kòp tê jê să, hìu bơnhă geh rài kis kal ke mờ kờp priă 9 tơlak đong; pà rlau 40 bơnah phan mờ rlau 600 nơm chèu glòm muh mat sơnơm ai ală hìu bơnhă geh rài kis kal ke gơtìp gơrềng tài bơh kòp Covid-19; pà 4 bơnah phan ai kơnòm bơsram Hìu bơsram Phổ thông dân tộc nội trú kơnhoàl mờ ală hìu bơsram mầm non, kấp dùl, kấp bàr xã Ia Đal in di ngai sơnđờm mut bơsram nam bơsram pa mờ tơn jơh nam bơsram mờ kờp priă 6 tơlak đong; jàu priă broă lơh “Lòt bal mờ oh tus hìu bơsram” ai 3 nă kơnòm bơsram in mờ kờp priă 22 tơlak 500 rơbô đong; dong kờl 15 tơlak đong ai hìu bơnhă 1 nă sau “kòn ròng ling sền gàr tiah nhàr lơgar in”.

Bơdìh hơ̆, Pôs đồng neh ai 12 nă Kuang bàng, cau ling pơgồp bal mờ gơnoar atbồ mờ làng bol tàm dùl tiah tơn tus bal crùh ồs sa 2 lồ brê tàm tiah thôn 8, xã Ia Đal mờ crùh ồs sa 2 lồ suơn kao su bơh sơnĕ 716 gơwèt thôn Ia Đer, xã Ia Đal dê; pơgồp bal mờ sơnĕ 716, UBND xã Ia Đal mblàng yal sa sào sàng kloh; rcang sơndră kòp tàm kòn bơnus mờ phan ròng geh 12 dơ̆, geh mờr 330 nă cau tus bal; dong làng bol lơh niam wơl 7 nơm hìu ờ diơng, tơnhào bùm blàng, điều mờ sơng ka sền gàr kơphê; ai sơntìl phan tam mờ bơto pơlam ai gĭt nđờ jơ̆t hìu bơnhă in bè bơta chài tam biăp; bơyai lơh broă lơh ròng kơnrồ me, dong kờl 1 nơm kờnrồ me ai hìu bơnhă rƀah in, mơkung dong làng bol tiah do in lơh niam wơl wàng ròng kơn rồ, ròng phan sàng goh, ờ do ờ dă kòp. Pôs đồng kung ai 2 nă Kuang bàng, cau ling là làng bol jơi bơtiàn kòn cau dờp lơh oh mi dong kờl 2 hìu bơnhă rƀah lik klàs rƀah; tàm pà 16 nă Kuang bàng, cau ling là đảng viên dong kờl 53 hìu bơnhă bơtàu tơnguh lơh sa.

Lơh jat srơh “gùt làng bol tus bal sền gàr gơnoar tờm ù tiah, sền gàr bơta lơngap lơngai tiah nhàr dà lơgar tàm tơngai pa”, Pôs đồng ling sền gàr tiah nhàr lơgar Hồ Le, Gah đơng lam ling sền gàr tiah nhàr lơgar càr Kon Tum neh mblàng yal, hòi jà geh 3 mpồl cau mờ 13 hìu bơnhă ơm tàm xã Ia Đal cih mat atbồ is 13 kơi sồ gùng tiah nhàr lơgar, 13 jrong tiah nhàr lơgar mờ 5 mpồl sền gàr bơta lơngap lơngai làng bol cih mat tus bal is sền gàr bơta lơngap lơngai, rơndap tap sèng. Gơwèt mờ xã Ia Tơi, tŭ do, Pôs đồng gam pơgồp bal lòt sền, mblàng yal hòi jà mpồl cau, cau dùl nă să is, hìu bơnhă tus bal atbồ is sền gàr bơta lơngap lơngai, rơndap tap sèng tàm tiah nhàr lơgar.

Thiếu tá Nguyễn Văn Ngọc – Kuang atbồ Pôs đồng ling sền gàr tiah nhàr lơgar Hồ Le đơs ngan: bơh 17 nam bơt bơtàu mờ dờng pràn, mờ bơhiàn dờng màng bơh “Cau ling Wa Hồ dê”, Kuang bàng, cau ling Pôs đồng ling sền gàr tiah nhàr lơgar Hồ Le bơh ală rài ờ rơngòt kal ke, neh bal mờ làng bol ală jơi bơtiàn ơm kis tàm tiah nhàr lơgar ià kơ̆ ngkơr phàu sền gàr tiah nhàr lơgar bơh dà lơgar kờñ gơboh dê ngai sơlơ kơ̆ kơl jap rlau tai.

Quốc Học ai bơh băo Kon Tum- Cau mblàng K’Hạnh