Pal sền ngăc, mìng tàm poh lài, khà cau bơtờp kòp neh gơguh uă ngan bal mờ rlau 210 nă cau pal mŭt hìu sơnơm piam kòp. Kòp bơtờp pràn ngan tàm sơnah ƀòn Tuy Hoà mờ ală sàh: Phú Xuân, Đồng Xuân, Sông Hinh, Krông Ana, Ea Súp, Ea H’leo gơ wèt càr Dăk Lăk. Broă kơryan kòp bơtờp, sền gàr pràn kơldang ai làng bol in tŭ do gam là kơnòl broă jal mhar, ờ gơtùi geh bơta sền ờ sơ̆p, ờ rơcăng ngăc.

Jơnau bơh tài gơlam tus broă kòp bơtờp gơguh tai uă tàm ală ù tiah sàh, sơnah ƀòn dê là tài bơh trồ tiah mìu mờ tơngai ờ bè ờs, ai tơl bơta ƀươn ai sơmăc tĕp rơtèl in lơh bơtờp kòp deh dùh rơ̆ rài. Pal kơlôi rơcăng rlau, tàm uă ƀòn tiah sar tiah ngài, bơhiàn mờng kwèng dơng dà mìu tàm ală yang, khàp mpờl bơdìh mơya ờ ndơl bơlnŏp, bal mờ bơta mờng kwèng ờ khòm tơrgùm ală phan sang sơrbì gùt dar hìu bơh dồ bơnah làng bol dê neh lơh gơlik ală “tiah deh dùh” sơmăc rơ̆ rài ngan.

Tềng đăp jơnau gơbàn ờ ƀươn soh do, Anih tờm Gròi sền kòp tê jê să càr Dăk Lăk gam pơgồp bal niam ngan mờ mpồl cau lơh sơnơm kâp hơđơm lam lơh ndrờm bal ală gùng dà broă rơndăp lơh. Bal mờ broă ƀồm dà sơnơm gơsơ̆t kòp, broă lơh bơsram tàp jrô broă mờ tơngguh uă pràn jak yal lài jơnau pơhìn ai mpồl cau lam lài tàm ală hìu sơnơm sàh, sơnah ƀòn gam geh sền gròi is ồn ngan. Đơs bè gùng dà broă rơndăp lơh kwơmàng ngan do, Ƀák sìh ồng Lê Phúc, Phó Kwang Lam bồ Anih tờm Gròi sền kòp tê jê să càr Dăk Lăk, pà gĭt:

“Bol hi tơngguh uă mờ lơh mhar broă lơh rơcăng, kơryan véc-tơ, hơ̆ là jăt sền, ƀồm gơsơ̆t sơmăc, kih dà, tăp sơmăc ai mpồl cau lơh sơnơm kâp hơđơm in tàm ală Hìu sơnơm sàh, sơnah ƀòn. Bơh hơ̆, tơngguh uă pràn jak khi dê nàng lơh geh jơnau yal lài pơhìn tàm tơl ƀòn lơgar in, nàng lơh jăt ƀươn ƀoài broă lơh yal lài kung bè cồng nha rlau tàm broă lơh rơcăng, kơryan kòp mprơm gơlik mhàm”.

Jơh nùs lơh ngan bơh gah lơh sơnơm dê là uă ngan, mơya dơ̆ tam lơh kơryan kòp mprơm gơlik mhàm mìng gơtùi lơh geh cồng nha tŭ geh bơta rơcăng lài bơh să tờm làng bol dê. Ala tài ờ rơcăng ngăc ơm kơ̆p kòp bơtờp gơ tus den hơ̆ sồng rơcăng, tơl hìu bơnhă pal lời tĕ 10 phuk pah poh nàng ơn sơrklŭp ală phan ngui đơ dơng dà, khòm tơrgùm sàng goh jơh sồ siă sang mờ gơgơs bơta mờng kwèng bĭc kơmùng ngai kung bè măng. Rơcăng lài tĕ lơh broă bơh ală broă dềt rơhền ngan rlau jơh nàng sền gàr pràn kơldang ai hìu bơnhă in mờ gàr kơ̆ bơta lơngăp lơngai ai mpồl bơtiàn in tàm kàl mìu do.