Tàm Hìu Sơnơm Ling klàng Làng bol lơh bal tiah is ồn Phú Quý, pah ngai geh git nđờ rơhiang dơ̆ làng bol tus kham mờ sơm ală bơta kòp bè ờs. Ală nam pa do, gah lơh sơnơm tàm bồt do neh geh uă tam gơl loh làng ngan mờ broă bơcri priă blơi tai phan lơh broă, rề ơnàng uă broă lơh drơng ala bơta jăk chài mờ tơnguh uă bơta niam kham sơm kòp tàm do tơn. Uă cau kòp lài do pal jun tus tàm ù gờl den tŭ do neh gơtùi kham, bơsong lài mờ sơm kòp tơn tàm bồt do, dong kờl làng bol tơrmù priă tă, tơngai lòt rê.

Ồng Nguyễn Văn Hai, tàm thôn Quý Hải pà git, di lah pơn drờm mờ lài do, bơta geh nàng kham sơm kòp neh ƀuơn rơlao uă ngan, mpồl y ƀák sìh jơh nùs tàm broă kham sơm kòp, ai geh nùs nhơm pin dờn làng bol in. “Tŭ do añ tus kham den ală ƀák sìh lơh broă niam ngan, chờ hờp, kham kòp hơ̆ sồng pà sơnơm ai làng bol in. Di lah pơn drờm mờ lài do den broă lơh sơnơm tàm bồt do neh bơtàu tơnguh rơlao uă ngan. Mìng geh ală cau gơtìp kòp jroă den pal jun ntrờn hìu sơnơm, tài bơta geh tàm bồt gam kal ke”.

Broă kham sơm kòp bè ờs tàm tiah is ồn Phú Quý tŭ do neh di pal mờ jơnau kờñ bơh làng bol dê. Mơya, mờ ală cau gơtìp kòp jroă bè kòl gùng mhàm tơngoh, gơdrồl mhàm plai nùs ha là sồt să uă bơta, bơta pràn sơm mhar mờ bơta geh tàm do kung gam ờ uă. Tàm tŭ hơ̆, broă jun ntrờn cau kòp tus tàm ù gờl gơrềng uă ngan tàm trồ tiah bal mờ tơngai ơhò lòt, geh tŭ pal hòi rơndeh par duk tus nàng pơn diang cau gơtìp kòp jroă.

Jăt ƀák sìh Bùi Thị Hảo, Phó Kwang lam bồ Hìu sơnơm Ling klàng Làng bol lơh bal tàm tiah is ồn Phú Quý pà git, jơnau kờñ jal mhar tŭ do là tơnguh uă bơta pràn bơsong lài sơm mhar tơn tàm tiah do nàng ngui “tơngai niam” dong kờl cau kòp kis niam. Tŭ do, hìu sơnơm tàm do kung gam ờ tơl ală gah sơm mìng dùl gah nền nòn, tàm hơ̆ uă ngan là tơnpràn sơm mhar, sơm plai nùs gùng mhàm mờ bơdìh tơngoh. Nàng tơrmù bơta kal ke do, Hìu sơnơm do neh pơgồp bal mờ Hìu sơnơm Bạch Mai jà ală cau jăk tus tơn tàm bồt nàng bơto sơm mhar tŭ gơtìp ờ gơlòt gùng mhàm, mờ dong kờl bơto nền nòn bè broă sơm gơtìp kờl gùng mhàm tơngoh ai mpồl cau lơh sơnơm tàm do in.

Ƀák sìh Bùi Thị Hảo pà git: “Tŭ do Hìu sơnơm neh geh Hìu sơnơm Bạch Mai dong kờl bơto ờ sa priă ai dùl mpồl cau sơm nền nòn nàng sơm mhar kòp kòl gùng mhàm tơngoh in, tàm hơ̆ geh dùl nă ƀák sìh mờ dùl nă điều dưỡng. Pa do geh Sờh Lơh sơnơm càr sền gròi tă priă blơi dùl nơm măi CT nàng bơsong broă sơm mhar tŭ gơtìp kò gùng mhàm tơngoh. Hìu sơnơm Bạch Mai kung dong kờl ai Hìu sơnơm in tàm broă cri bơyai tàm internet nàng git kòp, sền cồng nha bơh ngài, cri bơyai nàng git kòp di pal dong kờl bơsong mhar ală cau gơtìp kòp sơm mhar in”.

Mò Huỳnh Thị Phương Duyên, Kwang Lam bồ Sờh Lơh sơnơm càr Lâm Đồng pà git, tiah is ồn Phú Quý tŭ do geh 121 nă kwang bàng, viên chức gah lơh sơnơm dê, tàm hơ̆ geh 29 nă ƀák sìh, là tiah geh khà ƀák sìh tàm jơ̆t rơbô nă làng bol uă ngan càr dê. Mờ mpồl do, gah lơh sơnơm neh di pal mờ jơnau kờñ kham sơm kòp ai làng bol tàm bồt, mpồl ling bal mờ cau lơh ka lơh broă tàm dà lềng in.

Mơya, tềng đăp mờ jơnau kờñ bơtàu tơnguh ngai sơlơ uă, tàm hơ̆ uă ngan là tàm bơta tiah is ồn Phú Quý lơh pràn broă hòi jà lòt nhơl, gah lơh sơnơm càr Lâm Đồng pơn jăt tai ai lài tơnguh uă bơta pràn kham sơm kòp, tàm hơ̆ uă ngan là tơn pràn sơm mhar. Jăt mò Huỳnh Thị Phương Duyên đơs, Sờh Lơh sơnơm càr Lâm Đồng gam dan geh jơnau nàng lơh niam wơl, tơnguh bơta pràn phan bơna mờ bơtơl tai phan lơh broă nàng di pal niam rơlao jơnau kờñ kham sơm kòp tàm bơta krơi is bơh tiah dà lềng bồt dà lềng dê. “Bơta chờ hờp ngan là 100% kwang bàng lơh sơnơm tàm Phú Quý neh geh Anih tờm sơm mhar Kòl gùng mhàm tơngoh Hìu sơnơm Bạch Mai tus bơto tơn tàm broă tơn pràn sơm mhar ờ gơlòt gùng mhàm mờ neh geh ai sră dờp. Mờ Hìu sơnơm Bạc Mai kung hơ dong kờl ờ sa priă jơh priă tă nàng bơto ai Phú Quý in tus nam 2028”.

Broă tơnguh bơta pràn cau lơh broă, bơto nền nòn mờ bơcri priă blơi tơl phan lơh broă ờ mìng dong kờl tơnguh uă bơta niam kham sơm kòp ai làng bol tàm tiah is ồn Phú Quý in mờ gam pơgồp bal tàm broă gàr niam lơngăp lơngai ai cau lơh ka bal mờ cau năc lòt nhơl tàm tiah dà lềng ngài mờ ù gờl in. Do kung là broă rơcang lài kwơ màng nàng broă lơh sơnơm tàm tiah is ồn Phú Quý di pal rơlao mờ ală bơta kờñ sơm jal mhar tàm bơta krơi is bơh tiah dà lềng bồt dà lềng dê.