Đơs nền bè bơta gờn bơh kòp mprơm gơlik mhàm nam do dê, Phó Pơgru dờng, Tiến sìh ồng Trần Đắc Phu, lài do Lam bồ Kụk Lơh sơnơm rơcăng lài đơs là, kòp bơtờp do tŭ do ờ gam jăt bơta pal jăt nhai kàl ờs mờng bè lài tai. Dilah bè lài do kòp sùm lơh bơtờp pràn tàm kàl mìu hơ̆ sồng gơmù rơhời, den tŭ do khà cau bơtờp geh gĭt gŏ gùt nam, geh bal tàm kàl prang, pà gŏ jơnau pơhìn kòp bơtờp sùm geh tàm mpồl bơtiàn: “Jơnau pơhìn bơtờp uă den tŭ do sơnđờm geh tềl tơnggŏ gơguh rlau khà bơtờp pơndrờm bal dùl tŭ mờ nam lài, jơnau đơs gơbàn kal ke gĭt lài gơ di rlau tài bơh ờ gam tai jơnau gơ wơl wơl nàng bol he gĭt lài pơndrờm mờ lài do. Nam do, den geh ală jơnau ờ kwơ, bè jơnau trồ tiah, nhơm trồ tiah, lòt rê làng bol dê kung gơguh tai uă ngan. Mờ tơngai ir, mìu uă, trồ tiah rlau 25 độ lơh gơlik bơta ƀươn ngan ai sơmăc kòp mprơm gơlik mhàm in rơ̆ rài”.

Tàm ƀòn dờng Hồ Chí Minh geh khà cau bơtờp kòp mprơm gơlik mhàm uă ngan rlau jơh gùt lơgar, kờp tus nhai 6 nam 2026, neh gĭt gŏ 18 rbô nă cau kòp mờ 4 nă cau chơ̆t. Ală cau bơtờp kòp geh tàm jơh ală ƀòn lơgar. Jăt gah lơh sơnơm ƀòn dờng dê yal, kòp bơtờp kòp mprơm gơlik mhàm nam do geh tềl tơnggŏ gơguh tai gờñ rlau mờ bè ờs. Dùl bơta pal sền ngăc ngan là rơndăp tăp sèng cau bơtờp kòp gam geh bơta tam gơl. Tŭ do, rlau nggùl khà cau bơtờp là cau dờng, tàm hơ̆ mpồl sơnam bơh 11 tus 30 sơnam geh uă ngan rlau jơh. Bơta do pà gŏ, kòp mprơm gơlik mhàm ờ gam tai là bơta kòp gơbàn uă tàm kòn dềt bè uă cau kung gam kơlôi. Tiến sìh, ƀak sìh ồng Trương Hữu Khanh, Phó Chủ tịch ală mpồl kòp tàm bơtờp ƀòn dờng Hồ Chí Minh, tơngkah: “Is ồn bơh kòp mprơm gơlik mhàm dê là ngai mờ jơh duh să kung gam sơ wing sơl. Den tàng cau kòp hơ̆ jơh duh să mơya pal kah ngăc, ñă ntàu lòt rê bè ờs, ờ geh bơta lơi sơnđan là glar den hơ̆ sồng hòi là niam lơngăp lơngai. Ai dilah bè cau hơ̆ jơh duh să mờ ơm bĭc sùm, đơs sùm là sơnguài bồ, jê ndul halà glar, ờ gơdan sào den kơrhia geh jơnau pơhìn sơ wing. Den tàng he pal jăt sền bè gùng mhàm, huyết áp hơ̆ là bơta kơn jơ̆ mhàm dê. Hơ̆ sồng pal lòt kham wơl bulah là jơh duh să”.

Ală cau gĭt wă jrô gah broă do đơs nền, ờ dồ êt nă làng bol kung gam sền ờ sơ̆p sơl mờ bơta kòp do. Uă cau sơm is tàm hìu halà tus anih lơh sơnơm jơla ir tài bơh đơs do mìng là kòp duh să bè ờs lơm. Tàm tŭ hơ̆, kòp mprơm gơlik mhàm digơlan gơbàn mhar ngan, lơh sơ wing, gơlik mhàm uă, lơh aniai uă phan tàm să mờ gơlam tus chơ̆t să dilah ờ geh gŏ, sơm di tŭ. Ồng Võ Hải Sơn, Phó Lam bồ Kụk rơcăng kòp, Ƀộ Lơh sơnơm pà gĭt, làng bol kung kờñ pal sơrbì tĕ ală jơnau đơs tìs ờ di bè đơs là sơmăc tàm bơtờp kòp mìng rơ̆ rài tàm tiah dà ƀơ̆ halà cau kis tàm hìu jơnhoa cờn ơm bal, hìu jơnhoa cờn rơ̆p ờ huan ngan geh jơnau pơhìn bơtờp kòp. Tàm mùl màl, sơmăc tĕp rơtèl sùm deh dùh tàm ală phan ngui dơng dà sàng kloh tàm hìu bơnhă tơn bè gri bơkàu, sơbàk chi lơh hèr, thau dà tùh mrềt halà ală phan ngui gơkờn dà dềt.

“Jơnau pơyua bơh nam do dê là ờ geh kih dà den ờ geh kòp mprơm gơlik mhàm. Mờ bol hi kung kơ̆p kờñ là tơl hìu bơnhă pah poh lời di 10 phuk nàng sền nền wơl tiah geh tăp sơmăc, kih dà tàm hìu bơnhă”.

Kòp mprơm gơlik mhàm là kòp sơbơng roh mơya gơtùi lơm rơcăng kơryan lài dilah tơl nă làng bol tơngguh uă jơnau gĭt wă sền gàr pràn kơldang să tờm mờ mpồl bơtiàn; sùm ala dà gri bơkàu; khòm tơrgùm sồ siă sang mờ tơrblơ̆ trŭp ală phan ngui ờ ngui. Mờ làng bol kung pal bĭk kơ̆t kơmùng, ngui ală broă lơh kơryan sơmăc kăp mờ pơgồp bal mờ gah lơh sơnơm tàm ală broă lơh sàng goh tiah ơm kis, gơsơ̆t tăp sơmăc, kih dà tàm hìu bơnhă, mpồl bơtiàn.