Anih duh broă Làng bol càr Gia Lai pa ai lơh jat broă rơndăp lơh tàm pơdar ƀák sìh rê lơh broă geh tŭ tơngai pơr gon tàm ală hìu sơnơm sàh, sơnah ƀòn nàng kờñ sơlơ tơnguh tai bơta pràn jak lơh sơnơm tàm kấp hơđơm mờ tơnguh uă cồng nha sền gàr pràn kơl dang să jan ai làng bol in. Jat  broă rơndăp lơh, nam 2026 càr kờp dŭ ndrờn 38 nă ƀák sìh bơh ală hìu sơnơm, anih tờm lơh sơnơm mờ anih kham mờ sơm kòp dà lơgar rê dong kờl 30 sàh, sơnah ƀòn geh jơnau kờñ ai lơh lài. Tŭ do jơh gùt càr geh 135 hìu sơnơm sàh mờ pơgăp 370 tiah khàm kòp, mơya kung gam 4 hìu sơnơm kấp hơđơm ờ geh ƀák sĩ mờ 76 hìu sơnơm ờ ai geh ƀák sì lơh broă.

 Broă tàm pơ dar ƀák sìh rơ̆p pơgồp bơnah gàr niam cồng nha lơh broă kham sơm kòp bơh sơn rờp, tơrmù ƀà bơta kơn jơ̆ tàm trờn tus kơnă hơđang mờ ală bơta kòp bè ờs. Ală ƀák sìh geh trờn gam tus bal bơto bơtê broă lơh ờs mờng ai cau lơh sơnơm kấp hơ đơm in. Broă rơndăp lơh ai lơh lài tàm ală tiah sar lơgar ngài, tiah nhàr lơgar mờ tiah làng bol jơi bơtiàn dồ ết nă cau.

 Gah Lơh sơnơm càr Dăk Lăk gam lam lơh Nhai lơh broă uă kham pràn kơldang jat tơngai pơrgon ai làng bol in jat Jơnau lơh nền tàm pơrjum sồ 72 bơh Mpồl duh broă Đảng dà lơgar dê. Broă lơh lam lơh mờ kham sac rơ wah ai cau dờng sơnam in geh lam lơh dơ̆ lĕ bal tàm sơnah ƀòn Tân An, sơnah ƀòn Tuy Hòa, sàh Krông Bông mờ sàh Đồng Xuân nàng kờñ ai mờng chài lài mờ tŭ lam lơh tàm gùt càr bơh ngai 01/7 tus do.

 Ală anih kham sơm kòp neh rơcang wil tơl cau lơh broă, phan bơna, măi mok drơng broă lơh kham pràn kơldang. Mpồl cau geh kham lài geh: cau dờng sơnam, cau geh màng mờ dà lơgar, cau kuet kơlte, hìu bơnhă rƀah, hìu bơnhă ndrờm bè cau rƀah, cau gơbàn kòp jŏ nam, làng bol jơi bơtiàn dồ êt nă cau mờ làng bol tiah kal ke. Sờh Lơh sơnơm neh bơt bơtàu broă rơndap lơh mùl màl, jàu kơnòl broă ai ală mpồl in, gàr broă lơh geh lam lơh geh cồng nha tàm 102 sàh, sơnah ƀòn tàm càr.