Khà cau bơtờp kòp mprơm gơlik mhàm kung sùm gơguh tai. Gah lơh sơnơm càr Dăk Lăk gam sơlơ gròi sền ală tiah gơbàn uă bè kòp mprơm gơlik mhàm mờ lơh pràn broă lơh mblàng yal jơnau rơcăng kơryan kòp bơtờp do. Jăt Anih tờm Gròi sền kòp tê jê să càr Dăk Lăk dê yal, bơh bồ nam tus tŭ do, jơh gùt càr gŏ mờr 4 rbô 400 nă cau kòp mprơm gơlik mhàm, tàm hơ̆ geh 2 nă cau chơ̆t. Khà cau bơtờp gơbàn uă tàm nhai 08 mờ nhai 09 bal mờ mờr 4 rbô nă. Ƀòn dờng Buôn Ma Thuột mờ kơnhoàl Cư M’gar là 2 tiah geh khà cau bơtờp kòp mprơm gơlik mhàm uă ngan rlau jơh.

Tềng đăp bơta gơbàn kal ke bơh kòp mprơm gơlik mhàm dê, gah lơh sơnơm càr Dăk Lăk neh lơh pràn broă lơh pơgồp bal mờ ală sở, mpồl, gah broă, ală tiah nàng lơh sàng goh tiah ơm kis tàm ală tiah geh kòp; pồ tơl wơl Mpồl sồr lơh rơcăng lài kơryan kòp mờ sơlơ gròi sền tai ală tiah gơbàn uă bè kòp nàng di tŭ sồr lơh bơsong.