Gah lơh sơnơm càr Kon Tum gam jơh nùs lam lơh broă lơh rơcăng lài kơryan kòp bơtờp gơbàn gơs kòp pluh dờng. Nhai 08 pa do, gah lơh sơnơm càr Kon Tum gĭt gŏ geh 71 nă cau bơtờp kòp mprơm gơlik mhàm gơguh 20 nă pơndrờm mờ nhai lài. Tiah gŏ uă cau kòp do là kơnhoàl Kon Rẫy mờ 26 nă mờ 8 tàm kờp jơh 10 kơnhoàl, ƀòn dờng bơh càr dê geh cau bơtờp kòp mprơm gơlik mhàm.

Jăt ƀak sĩ mìng dồ gah kòp II Đỗ Ngọc Hoà, Phó Kwang ătbồ Sở Lơh sơnơm càr Kon Tum dê yal, kòp mprơm gơlik mhàm tàm càr tŭ do ờ gŏ gơ jăt bơta tàm pơdar 3 nam geh dồ dơ̆ bơtờp kòp uă mờ nam lơi kung geh lơm mờ ờ bơtờp jăt kàl tai. Tŭ do, càr Kon Tum gam geh ală dơ̆ mìu jŏ jòng, lơh geh anih ƀươn ai kih dà in deh dùh rơ̆ rài, pơhìn gơlam tus lơh bơtờp uă kòp mprơm gơlik mhàm. Gah lơh sơnơm kung sơlơ tơngguh tai broă lơh rơcăng lài kơryan kòp mprơm gơlik mhàm lơh bơtờp, lam gơsơ̆t kih dà nàng sền gàr sàng goh tiah ơm kis.