Tàm Hìu sơnơm xã Cư Êbur, ƀòn dờng Buôn Ma Thuột, càr Dăk Lăk dê, bi H’Đi Êñuôl, yal: kòn kòp lơbơn ñâm ñô ngan, pal mŭt piam kòp tàm hìu sơnơm uă den tàng kòn neh 3 sơnam mơya bi kung gam ờ hềt ai cĭt ding vaccinne rơcăng kòp rang lơi sơl. Tŭ do gŏ tàm ƀòn geh uă kòn se bơtờp kòp rang, kơlôi rơcăng ai bơta pràn kơldang să jan kòn dê in den tàng bi jun kòn lòt cĭt vaccine rơcăng kòp rang. Bi H’Đi Êñuôl, đơs: Gŏ bơta kòp rang tŭ do kal ke ngan. Geh ală mơi wa tàm hìu sơnơm mblàng yal, hòi jà tơl nă cau lòt cĭt den tàng geh bơta gĭt wă niam rlau. Bal mờ oh ngòt să jan kòn dê lơbơn ờ pràn dilah ờ cit den rơ̆p gơrềng tus pràn kơldang să jan kòn dê.

Ồng Y Suôn Êñuôl, Phó Kwang ătbồ Hìu sơnơm xã Cư Êbur, pà gĭt, dồ nhai do xã neh gŏ 31 nă cau kòp rang. Cau kòp bơh chờm gŏ tàm hìu bơsram mầm non Hoàng Anh, tàm ƀòn Đung, tơnơ̆ hơ̆ bơtờp tus 7 thôn, ƀòn. Ală cau gơtìp kòp rang jơh ală ndrờm ờ hềt cĭt vaccine rơcăng kòp. Hìu sơnơm xã Cư̆ Êbur neh jăt sền, căng tiah geh kòp se bơtờp kòp rang mờ lơh pràn broă lơh mblàng yal nàng kờñ tơngguh uă bơta gĭt wă bơh làng bol dê tàm broă rơcăng lài, kơryan kòp. Ồng Y Suôn Êñuôl, yal: Bơh nhai 8 tus tŭ do neh cĭt jơh 7 thôn, ƀòn mờ 363 nă kơnòm dềt tàm rlau 430 nă kơnòm dềt, geh mờr 85%. Tŭ do pơn jăt tai kờp sền nền wơl sră cih măt kòn dềt ờ hềt geh cĭt vaccine rơcăng kòp rang. Bơh tŭ bơtờp kòp rang tus tŭ do, añ neh ngui zalo, facebook mờ pơrjum ală kwang ătbồ thôn, pơrjum làng bol mờ kơnờm ală cau lơh broă bal lòt mblàng yal tơn mờ să, he pờ tàm ală loa rơdio xã dê dồ poh dồ dơ̆, tŭ jiơ pờ jòng pơgăp 10 phuk.

Ƀòn dờng Buôn Ma Thuột tŭ do geh khà cau bơtờp kòp rang uă ngan rlau jơh tàm càr Dăk Lăk, mờ 74 nă cau kòp. Gah lơh sơnơm neh kơryan jơh ală tiah geh kòp ờ lời kòp rang lơh bơtờp pràn tus uă tiah. Mơkung sơlơ lùp sền, jăt sền, sền gŏ gờñ ală cau kòp mờ pin kòp tàm ƀòn lơgar, tài bơh ù tiah tơrgùm làng bol ơm kis gal ngan. Bal mờ hơ̆ den kờp sền nền wơl, lam lơh cĭt bơtơl, cĭt jơh vaccine ai ală cau ờ hềt cĭt tơl in. Ồng Võ Minh Hùng, Kwang ătbồ Hìu sơnơm ƀòn dờng Buôn Ma Thuột, pà gĭt: Broă lơh lài ngan kung gam sơl là broă lơh mblàng yal lam ală sau lòt cĭt vaccine. Dơ̆ bàr là gŏ mờ sơm kòp ai cau kòp in di tŭ. Dơ̆ pe là tơnơ̆ tŭ gŏ cau kòp den tus lùp sền mờ cĭt bơtơl vaccine rơcăng kòp rang rubela ai kòn se ờ hềt cĭt tơl 2 ding vaccine rơcăng kòp rang ai kòn dềt hơđơm 5 sơnam ai kòn dềt tàm mpồl làng bol tiah drà in mờ ală thôn, ƀòn geh cau kòp in.

Kờp tus gùl nhai 09, càr Dăk Lăk gŏ 136 nă cau bơtờp kòp rang tàm 14 tàm kờp jơh 15 kơnhoàl, ƀòn drà dờng, ƀòn dờng tàm càr dê. Pal sền ngăc kòp gơguh mhar tàm pơgăp dồ nhai do bal mờ rlau 100 nă cau kòp. Jơh ală cau bơtờp kòp rang là kòn dềt bơh 01 tus 04 sơnam, mờ 2/3 khà cau kòp ờ hềt geh cĭt vaccine. Ƀak sĩ ồng Lê Phúc, Phó Kwang ătbồ Anih tờm Gròi sền kòp tê jê să càr Dăk Lăk dê đơs, jơnau bơh tài lơh kòp rang gơguh mhar là tài bơh jơnau gơkòl ai pà vaccine bơh Broă lơh cĭt vaccine rề ơnàng dê, gơlam tus gơmù bơta pràn ờ bơtờp kòp tàm mpồl bơtiàn. Ƀák sĩ ồng Lê Phúc, đơs: Jăt bol hi den cĭt vaccine rơcăng kòp rề ơnàng là kwơmàng mờ nàng lơh bè lơi hơ̆ jơh ală tiah tŭ do geh cau kòp den sồr ală Hìu sơnơm xã, Hìu sơnơm kơnhoàl kờp sền nền wơl khà kơnòm dềt ờ hềt cĭt den tus cĭt bơtơl, cĭt jơh nàng lơh bè lơi tơngguh khà cĭt vaccine rơcăng lài kòp tàm mpồl bơtiàn gơguh. Bơdìh hơ̆ tai, den bol hi tơrgùm mblàng sền kòp bơtờp ală cau kòp rang nàng gĭt nền, sơlơ yal lài jơnau pơhìn nàng geh broă lơh bơsong dipal.

Rang là kòp bơtờp sơbơng roh, digơlan lơh gơbàn gơmù bơta pràn ờ bơtờp kòp lơh kòn dềt ƀươn gơtìp  bơtờp uă ală ƀin tu bih khih ndai mờ tìp uă bơta gơ aniai, bè: Ồm ngkhài tồr; as sồt klờm soh kơn jơ̆; as sồt tơngoh; gơjroh è; sồt kơltau măt; rơgai ờ pràn să jan…Den tàng bè hơ̆ nàng rơcăng lài rơcăng kơryan kòp rang, bal mờ broă lơh ngan bơh gah lơh sơnơm dê, làng bol pal rơcăng lài lam kòn se lòt cĭt vaccine rơcăng kòp rang wil tơl mờ di tơngai. Tŭ gŏ geh ală tềl tơnggŏ duh să, bơsiă, rơluh muh, gơlik toh pơrhê pal ai ơm yah ngài bơh gờñ mờ lam kòn dềt tus ală hìu sơnơm rềp ngan rlau jơh nàng di tŭ kham, sơm kòp rơcăng lài ală jơnau gơ aniai mờ gơbàn kơn jơ̆ bơh kòp dê.