Nam bơsram pa 2024-2025 kơnhoàl Kon Plông, càr Kon Tum geh rơlao 7 rơbô nă kơnòm bơsram mờ 29 mpồl hìu bơsram. Tŭ ală kơnòm bơsram ơdŭ 01 sơn đờm lòt bơsram, ală kơnòm bơsram neh geh pơgru bơto nền nòn ngan bè bơta git wă tàm broă rơcang drơng pleh tŭ tơrluh ù gơlik geh. Pơgru Cao Thị Nguyệt, Atbồ Hìu bơsram kấp dùl Măng Đen, pà git: “Ală kơnòm bơsram neh git tàm broă nàng rơcang drơng pleh tŭ gơtìp tơrluh ù. Tàm hơ̆ uă ngan ală bơyô neh geh ală jơnau git wă niam ngan, rơcang drơng pleh mhar ngan. Tŭ gơlik geh dùl bơta lơi lơh mprơm rơngô den ală bơyô neh jòi tus tàm anih pồn kơl jăp ngan”.

Pơgru Võ Quang Vinh, Phó Kwang atbồ Cơl dŭ lơh broă Bơto bơtê mờ Bơsram kơnhoàl Kon Plông đơs nền, rơcang pleh mờ bơta tơrluh ù, ală nam pa do broă tơnguh uă jơnau git wă ai ală kơnòm bơsram bal mờ cau pơgru in nàng tơmù ờ uă ngan bơta hoàc huơr tŭ gơtìp tơrluh ù tàm kơnhoàl là broă lơh sùm bơh gah bơto bơtê mờ bơsram kơnhoàl dê. Pơgru Võ Quang Vinh pà git: “Cơl dŭ lơh broă gah bơto bơtê neh pơgồp bal mờ ală mpồl lơh broă nàng bơyai lơh bơsram tàp tŭ gơlik geh tơrluh ù. Gơwèt mờ kơnòm bơsram, cau pơgru tàm ală hìu bơsram tŭ geh jơnau yal gơtìp tơrluh ù ală kơnòm bơsram là he pal ntoăt lik bơdìh, mŭt tàm rồm kơƀàng ha là tàm rồm jơnờng bĭc nàng pleh. Jơnau git wă bơh cau pơgru bal mờ kơnòm bơsram là niam ngan”.

Mùl màl pà gŏ bơh nhai 04 nam 2021, tŭ tơrluh ù sơn đờm gơtìp mờ bơta gơlik geh uă, geh klŏ tàm kơnhoàl Kon Plông, càr Kon Tum, Anih lơh broă Vật lý địa cầu pơgồp bal mờ gơnoar atbồ kơnhoàl mhar tus bal nàng yal, mblàng yal nàng làng bol in ờ ngòt mờ jơnau git wă rơcang pleh nàng tơmù ờ uă ngan hoàc huơr.

Ồng Phạm Thanh Bình, Phó kwang atbồ Mpồl đơng lam Rơcang pleh mờ rềs àr bơh ù tiah, trồ tiah, jòi dong klàs cau gơtìp rềs àr mờ Rơcang pleh làng bol, Kwang atbồ Cơl dŭ lơh broă Sa suơn sre mờ Bơtàu tơnguh Ƀòn lơgar kơnhoàl Kon Plông đơs nền: “Kơnhoàl neh rơcang lơh ală gùng dà broă lơh nàng rơcang pleh, tàm hơ̆ uă ngan là broă mblàng yal bè ală jơnau git wă geh tus di pơgăp rơlao 90%. Lài do nùs nhơm làng bol geh bơnah kơlôi rơcang, ngòt, tơnơ̆ mờ tŭ geh mblàng yal làng bol neh git, wă mờ ờ kơlôi rơcang uă tai”.

Pa do, tơnơ̆ mờ tŭ gơtìp tơrluh ù pràn ngan bơh lài tus tŭ do mờ bơta pràn 5 độ richter, lơh mprơm rơngô jơh tus gùt tiah Tây Nguyên, Anih lơh broă Vật lý địa cầu mờ gơnoar atbồ kơnhoàl Kon Plông neh bơyai lơh dơ̆ mblàng yal, bơsram tàp, bơto sồr ai mờr 1 rơbô nă làng bol in git tàm broă rơcang drơng pleh, rơcang lài mờ tơrluh ù. Mờ pà rơlao 26 rơbô 700 pang sră cih bè jơnau git wă, bơto sồr tàm broă rơcang drơng pleh mờ tơrluh ù ai làng bol in. Tiến sĩ Bùi Thị Nhung, cau lơh broă kơlôi sơnơng bè tơrluh ù tàm Anih lơh broă Vật lý địa cầu gơwèt Viện hàn lâm mờ Kông nghệ Việt Nam pà git, bơh cồng nha lòt sền bơta gơrềng bơh tơrluh ù gơwèt mờ làng bol tàm tiah klŏ tơrluh ù tàm kơnhoàl Kon Plông, càr Kon Tum dê.

Mpồl lơh broă do gam pơn jăt tai cih gơs ală pang sră di pal mờ mùl màl nàng tơnguh uă jơnau git wă rơcang pleh mờ tŭ lơi kung rơcang lài ai ai làng bol in nàng gơtùi kis bal jŏ jòng mờ tơrluh ù. Tiến sĩ Bùi Thị Nhung, pà git: “Bol añ neh git ală nùs nhơm, jơnau kơ̆p kờñ bơh làng bol dê kung bè ală bơta gơlik geh mờ làng bol gơtìp tàm tơrluh ù. Bơh tŭ hơ̆ bol añ geh cih gơs ală pang sră bơto sồr ai làng bol in nàng gơtùi dờp bal mờ bơta tàm mùl màl tàm tiah do dê”.

Lòt bal, dong kờl làng bol mờ gơnoar atbồ tàm tiah klŏ tơrluh ù kơnhoàl Kon Plông, càr Kon Tum, tus tŭ do Anih lơh broă Vật lý địa cầu neh crăp tàm kơnhoàl 12 anih sền gròi nàng di tŭ sền bơta tơrluh ù kung bè drơng tàm broă kơlôi sơnơng in. Lơh jăt jơnau sồr bơh Thủ tướng Cíñ phủ, Anih lơh broă do kung gam lơh ngan bơyai lơh kơlôi sơnơng nền nòn, lơh loh tài bơta lơi lơh gơtìp tơrluh ù gơguh ni sơna tàm tiah do. Nàng dong kờl làng bol tàm tiah klŏ tơrluh ù kơnhoàl Kon Plông tơnguh jơnau git wă nàng rơcang pleh mờ tŭ lơi kung rơcang lài gơtùi kis gơdờp bal jŏ jòng mờ tơrluh ù, Quân khu 05 neh lơh jăt broă lơh nàng tŭ lơi kung rơcang lài drơng pleh mờ tơrluh ù tàm kơnhoàl do. Bè jŏ jòng càr Kon Tum kung neh kơlôi tus broă lơh niam wơl broă bơtàu tơnguh nàng gơdờp bal, mờ gơtùi tơmù uă ngan hoàc huơr tŭ gơtìp tơrluh ù.