VOV4.K’ho- Ngai òr 31/8, Quân đoàn 3 gơwèt Bộ Quốc phòng lơh pôs đồng tàm càr Gia Lai neh bơyai dơ̆ ai cau lòt lơh broă lòt jun mờr 60 tấn phan bơna dong kờl làng bol tiah kòp ƀòn dờng Hồ Chí Minh.

Nền cê bè do, tàm mờr 60 tấn phan bơna kờñ pal geh bơh Quân đoàn 3 dê geh rlau 20 tấn phe, rlau 20 tấn phan bơna, tàm hơ̆ geh: phan sa ro, puăc hộp, dà toh, ƀung mi, tơngi, ƀòk ngòk mờ mờr 19 tấn biăp, bùm, kơnuh. Do là ală phan sa geh kuang bàng, cau ling bơh ală mpồl ling tàm Quân đoàn 3 dê tă pơgồp mờ tơnguh tai broă lơh sa tàm tơngai do. Jơh ală khà phan bơna kờñ pal geh do geh mpồl 10 nơm rơndeh bơh Quân đoàn 3 dê jun mờ jàu Ủy ban Mặt trận dà lơgar Việt Nam kơnhoàl Bình Chánh, ƀòn dờng Hồ Chí Minh jàu pà làng bol tàm do in tam dră mờ kòp.

Cau mblàng Lơ Mu K’Yến