VOV4.K’ho- Pơn jăt tai broă lơh Pơrjum dơ̆ 2, Quốc hội khoă 15, drim òr (08/11), Quốc hội pơrjum tơrgùm tàm Hìu Quốc hội, Quốc hội cri bơyai bè cồng nha lơh jăt rơndăp broă tơnguh bơtàu lơh sa mpồl bơtiàn nam 2021; kờp dŭ rơndăp    broă tơnguh bơtàu broă lơh sa mpồl bơtiàn nam 2022; jơnau yal bè broă rơcang sơndră mờ kòp Covid-19 mờ broă lơh jăt Nghị quyết sồ 30 bè pơrjum dơ̆ sơnrờp, Quốc hội khoă 15.

Ai pơgồp jơnau đơs tàm cồng nha lơh jăt broă rơndăp lơh tơnguh bơtàu lơh sa mpồl bơtiàn nam 2021, geh uă kuang bàng ndrờm đơs là, bơcri priă dà lơgar là dùl tàm ală bơta pràn kuơ màng ngan nàng chồl pràn broă gơguh lơh sa. Uă kuang bàng đơs là, nàng tơnguh wơl broă lơh sa mờ tơnguh bơtàu lơh sa tàm bơta bè ờs pa pal sền gròi tus mờ mpồl broă dong kờl mpồl lơh sa kă bro sơrlèt mờ kal ke, ring niam broă lơh sa.

Bè broă lơh jăt kes priă dà lơgar nam 2021, kờp dŭ kes priă dà lơgar, gùng dà tam pà kes priă dà lơgar nam 2022, ală kuang bàng đơs tờm: tàm bơta do pal mùl màl tềm pềr, lơh jăt broă “tềm pềr” lơh jăt nền nòn broă lơh glài, lơh niam broă lơh priă jền, atbồ nền nòn broă tă kes priă dà lơgar.

Cau mblàng Ndong Brawl