VOV4.K’ho- Kung tàm ngai 01/4, Quốc hội cribơyai tàm hìu pơrjum bè Jơnau yal broă lơh tơngai bơh nam 2016 tus nam 2021 bơh Kiểm toán dà lơgar dê; cribơyai bè jơnau cih khà kuang bàng lơh broă sùm bơh Hội đồng Nhân dân ƀòn dờng Hà Nội dê tơngai lơh broă bơh nam 2021 tus nam 2026. Jơnau yal bè broă lơh bơh Kiểm toán dà lơgar dê tơngai bơh nam 2016 tus nam 2021 ai gŏ, Kiểm toán dà lơgar neh lam lơh broă rơndap lơh kiểm toán mờ uă cồng nha geh pơn rơ, pơgồp bơnah kuơmàng lơh sir cơ chế broă lơh, rơcang sơndră, kơryan sa kuề sa kuà, hoàc huơr mờ sơlơ tơnguh kơrnuat pal jat, tơnguh cồng nha atbồ, ngui priă jền, phan bơna dà lơgar.

Mùl màl, tàm tơngai lơh broă, Kiểm toán dà lơgar sồr lơh glài mờ priă rlau 353 rbô 700 tơmàn đông; jàu 20 broă geh tềl tơnggŏ lơh tìs ai anih kảnh sát lùp khàu in nàng lùp khàu, lơh loh mờ lơh glài jat jơnau cih bơh adat boh lam dê. Bè cồng nha lam lơh jơnau sồr kiểm toán, tơngai lơh broă bơh nam 2016 tus nam 2021, khà jơnau dan bè lơh glài mờ priă bơh Kiểm toán dà lơgar dê neh geh ală mpồl lam lơh là rlau 237 rbô 500 tơmàn đong, geh 73,6% kờp jơh khà jơnau dan; uă sră nggal neh geh Chính phủ, ală Bộ, gah broă lơh mờ ală tiah sang tĕ, tam gơl, bơtơl jat jơnau sồr bơh Kiểm toán dà lơgar dê.

Cau mblàng K’Duẩn