VOV4.K’ho - Mho òr (16/08), tàm hìu Quốc hội, Chủ tịch Quốc hội ồng Vương Đình Huệ đơng lam dơ̆ pơrjum bè broă rơcang bơh Mpồl kuang bàng ala măt Quốc hội lơgar Việt Nam tus pơrjum Đại hội đồng AIPA-42 geh bơyai lơh pờ tàm internet bơh ngai 23 tus ngai 25 nhai 8 geh lơgar Brunei, Chủ tịch AIPA-42 đơng lam.

Tàm dơ̆ pơrjum, Chủ tịch Quốc hội ồng Vương Đình Huệ đơs uă tus mờ broă pơn jăt tai pal geh lơh jăk chài, tơnguh uă cồng nha lơh broă bal mờ lơgar ndai bơh Quốc hội dê là dùl tàm ală bơta tờm tam gơl pa broă lơh Quốc hội dê. Lơh broă bal mờ lơgar ndai Nghị viện pal pơgồp bal tàm broă tơnguh bơngă, rùp rài mờ bơngă pin dờn bơh dà lơgar he tàm tiah do mờ tàm dunia. Tàm bơta hơ̆, Chủ tịch Quốc hội sồr, ală anih lơh broă geh gơnoar, tàm hơ̆ uă ngan là Ủy ban Đối ngoại mờ Văn phòng Quốc hội pal chồl mhar broă rơcang mờ tơl niam ală tơngu me tus bal bơh Mpồl kuang bàng ala măt dờng màng Quốc hội Việt Nam dê tàm Đại hội đồng AIPA-42. Tàm hơ̆ kuơ màng ngan là tàm bơta kòp Covid-19 gam gơtìp kal ke bè tŭ do, Chủ tịch Quốc hội đơs tờm, Quốc hội lơgar Việt Nam pal ai tơngŏ loh làng nùs nhơm bè lơh broă bal mờ ală nghị viện tàm mpồl AIPA mờ ală lơgar tàm mpồl ASEAN tàm broă rơcang sơndră mờ kòp Covid-19.

Cau mblàng Ndong Brawl