VOV4.K’ho- Tềng đap bơta đơng lam bơh Chủ tịch Quốc hội, ồng Vương Đình Huệ dê, drim ngai 10/11, dơ̆ lùp mờ hơ jơnau lùp sơn rờp gơwèt tus mờ mpồl broă gơwèt gah lơh sơnơm neh geh lơh. Đơs mut lơh dơ̆ lùp mờ hơ jơnau lùp, Chủ tịch Quốc hội ồng Vương Đình Huệ đơs nền: Broă lơh lùp mờ hơ jơnau lùp ờ mìng là dùl broă lơh gròi sền, sơlơ tơnguh kơnòl mblàng lơh loh, ngan là bơh cau atbồ dê. Do gam là tŭ nàng tàm dong kờl bal ai broă lơh gròi sền in, kung bè lam lơh kơnòl crơng gơs adat boh lam mờ lơh nền ală broă kuơmàng dà lơgar dê.

Lùp Bộ trưởng Bộ Y tế ồng Nguyễn Thanh Long, uă kuang bàng geh jơnau lùp bè broă gàr tơl khà sơnơm vaccine mờ atbồ khà priă lơh xét nghiệm kòp Covid-19, sơnơm sơm kòp, phan bơna, măi mok, sinh phẩm xét nghiệm. Broă “tam gơl khà priă xét nghiệm kòp Covid-19” kung geh uă kuang bàng lùp tàm hìu pơrjum Quốc hội dê. Bộ trưởng Y tế ồng Nguyễn Thanh Long đơs là: khà priă phan bơna, măi mok, sinh phẩm gơ wèt tàm anih lơh gơlik ală bơta phan do, tŭ tơngai blơi phan. Mờ kung sền gŏ kơnòl bơh gah lơh sơnơm dê mờ hơ pơrgon lam lơh jơh nùs, kràñ cê broă sền sơwì, gròi sền gơwèt tus mờ broă khà priă xét nghiệm tàm tơngai tus.

Uă kuang bàng sồr lơh loh broă sền sơwì, gròi sền bơh Bộ Y tế dê lời gơlik geh ală broă tìs tàm tơngai lài. Chủ tịch Quốc hội ồng Vương Đình Huệ sồr: nam 2022 tơrgùm lùp sền, sền sơwì uă broă lơh hòi jà tă pơgồp, atbồ, ngui bơta pràn tă pơgồp ai broă lơh rơcang sơndră kòp in, kơryan bơta ờ niam, sơmờm bơta kuơ mpồl.

Cau mblàng K’Duẩn