VOV4.K’ho- Drim ngai 20/10, tàm Hìu pơrjum Diên Hồng, tềng đap bơta đơng lam bơh Chủ tịch Quốc hội ồng Vương Đình Huệ dê, Quốc hội neh mut lơh yŭ rơyùm pơrjum dơ̆ 2, Quốc hội khóa 15 jat broă lơh pờ tơn tàm internet tàm anih pờ tơlik tơn Diên Hồng, Hìu lơh broă Quốc hội mờ 62 anih pờ tơlik tơn tàm ală càr, ƀòn dờng. Jat broă rơndap lơh neh geh ring bal, tàm pơrjum do, Quốc hội geh sền sơ wì, ring bal 2 rơndap lơh adat boh lam, 5 jơnau rơcang cih nghị quyết mờ ai jơnau đơs bè 5 rơndap lơh adat boh lam.

Quốc hội sền sơ wì ală jơnau yal bơh Chính phủ dê bè sền sơ wì cồng nha lam lơh broă rơndap lơh bơtàu tơnguh lơh sa mpồl bơtiàn mờ kờp dŭ tă dơ̆ ngui kes priă dà lơgar nam 2021; sền sơ wì mờ lơh nền broă rơndap lơh bơtàu tơnguh lơh sa- mpồl bơtiàn nam 2022, kờp dŭ tă dơ̆ ngui kes priă dà lơgar mờ rơndap broă tam pà kes priă dà lơgar nam 2022 mờ broă rơndap lơh priă jền- kes priă dà lơgar 3 nam, bơh nam 2022 tus nam 2024; broă ruc wơl tŭ tơngai lam lơh tam gơl broă lơh priă nhai jat Nghị quyết bơh dà lơgar mờ Quốc hội dê; broă lơh rơcang sơndră kòp Covid-19 mờ broă lam lơh jat Nghị quyết sồ 30 nam 2021 bơh pơrjum dơ̆ 1, Quốc hội khóa 15 dê; sền sơ wì, lơh nền broă rơndap lơh rơndap tap sèng wơl rài lơh sa tơngai bơh nam 2021 tus nam 2025; rơndap ù tiah ngui ù dà lơgar tơngai bơh nam 2021 tus nam 2030, broă wèt sền tus nam 2050 mờ rơndap ù tiah ngui ù dà lơgar 5 nam, tơngai bơh nam 2021 tus nam 2025 mờ 2, 3 tơngume kuơmàng ndai.

Cau mblàng K’Duẩn