VOV4.K’ho- Pơn jat tai pơrjum dơ̆ 11, ngai do 05/4, Quốc hội lơh broă lơh pồ Chủ tịch lơgar, Thủ tướng Chính phủ mờ broă lơh đùh sră ndơ̆p. Tơnơ̆ dơ̆ pồ, Chủ tịch lơgar pa, Thủ tướng Chính phủ pa geh yal bơr guh at gơnoar broă. Ồng Vương Đình Huệ Chủ tịch Quốc hội neh yal mờ Quốc hội in tơn pồ ồng Nguyễn Xuân Phúc nàng Quốc hội in pồ lơh Chủ tịch lơgar. Tàm ngai do, Chủ tịch lơgar yal sră cih mat cau tơlik mat tĕ khà nàng Quốc hội pồ Thủ tướng Chính phủ, cribơyai tàm mpồl bè kờp dŭ Kuang bàng nàng pồ Thủ tướng Chính phủ.

Ƀùi mho, Quốc hội pồ Thủ tướng Chính phủ mờ broă lơh đùh sră ndơ̆p; pờ tê ring bal Nghị quyết pồ Thủ tướng Chính phủ. Pơn jat hơ̆, Thủ tướng Chính phủ yal bơr guh at gơnoar broă tềng đap Quốc hội. Kung tàm poh lơh broă lồi dŭt bơh pơrjum dơ̆ 11 dê, Quốc hội geh lơh jat broă ai tơn jơh at gơnoar broă mờ lơh broă lơh pồ Phó Chủ tịch lơgar, bàr pe nă Kuang bàng Ủy ban Thường vụ Quốc hội; chủ nhiệm bàr pe Ủy ban bơh Quốc hội dê, Tổng thư kĭ Quốc hội, Tổng Kiểm toán Dà lơgar mờ broă lơh đùh sră ndơ̆p.

Cau mblàng K’ Hạnh