VOV4.K’ho- Pơn jat tai broă lơh lơh broă tàm Pơrjum dơ̆ 11, ngai do, 31/03, Quốc hội lơh broă tàm Anih pơrjum mờ lời jơh tŭ jiơ ai broă lơh Kuang bàng, pồ uă gơnoar broă Kuang đơng lam bồ bơh Quốc hội dê. Tàm gơnoar broă Chủ tịch Quốc hội, ồng Vương Đình Huệ - Ủy viên Bộ Chính trị, Bí thư Thành ủy Hà Nội, Bí thư Bộ Tư lệnh càr lơgar, Kuang atbồ Mpồl Kuang bàng Quốc hội ƀòn dờng Hà Nội là Kuang bàng geh yal tơngĭt nàng Quốc hộị in pồ at gơnoar broă ala mò Nguyễn Thị Kim Ngân neh geh Quốc hội ai tơn jơh at gơnoar broă.

Ồng Vương Đình Huệ đùh sră tĕ khà

Tàm dơ̆ lơh broă drim do, Ủy ban Thường vụ Quốc hội yal mờ Quốc hội in cồng nha cribơyai tàm Mpồl mờ mblàng yal, iăt, kơno jơnau đơs bơh Kuang bàng Quốc hội dê bè kờp dŭ Kuang bàng nàng pồ Chủ tịch Quốc hội, Chủ tịch Mpồl duh broă tĕ khà dà lơgar. Pơn jat hơ̆, Quốc hội cribơyai, pờ tê ring bal sră cih mat mờ pồ Chủ tịch Quốc hội, Chủ tịch Mpồl duh broă tĕ khà dà lơgar mờ broă lơh đùh sră ndơ̆p. Kung tàm dơ̆ lơh broă ngai do sơl, Ủy ban Thường vụ Quốc hội yal mờ Quốc hội in ai tơn jơh at gơnoar broă bàr pe Phó Chủ tịch Quốc hội mơkung yal sră cih mat yal tơngĭt Kuang bàng ala.

Cau mblàng K’ Hạnh