VOV4.K’ho- Ngai do 25/3, pơrjum dơ̆ 11, Quốc hội khóa 14 mut tàm ngai lơh broă dơ̆ 2. Tàm dơ̆ pơrjum ƀùi drim tàm hìu pơrjum, ală kuang bàng geh iat jơnau yal broă lơh tơngai bơh nam 2016 tus nam 2021 bơh Anih cah rơña Làng bol jơnhua ngan rlau jơh dà lơgar, Viện Kiểm sát làng bol jơnhua ngan rlau jơh dà lơgar, Kiểm toán dà lơgar mờ jơnau yal bè jơnau dan, jơnau đơs bơh cau tĕ khà dê.

Ủy viên Mpồl duh broă tĕ khà dà lơgar, Kuang atbồ Văn phòng Mpồl duh broă tĕ khà dà lơgar, ồng Nguyễn Hạnh Phúc yal Jơnau yal cồng nha lam lơh broă lơh tĕ khà kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021 tus nam 2026 bơh tŭ crơng gơs Mpồl duh broă tĕ khà dà lơgar tus nhai 3 nam 2021.

Ƀùi mho, ală kuang bàng cribơyai tàm mpồl bè Jơnau rơcang cih jơnau yal broă lơh tơngai lơh broă khoá 14 bơh Quốc hội dê; jơnau yal broă lơh tơngai lơh broă khoá 14 bơh Ủy ban Thường vụ Quốc hội, Hội đồng Dân tộc, ală Ủy ban bơh Quốc hội dê mờ ală jơnau yal broă lơh tơngai bơh nam 2016 tus nam 2021 bơh: Chủ tịch lơgar, Chính phủ, Anih cah rơña làng bol jơnhua ngan rlau jơh dà lơgar, Viện Kiểm sát làng bol jơnhua ngan rlau jơh dà lơgar, Kiểm toán dà lơgar.

Cau mblàng K’Duẩn