VOV4.K’ho- Pơn jăt tai broă lơh tàm pơrjum dơ̆ 2, drim do 13/11, Quốc hội pờ tê ring bal Kơrnoăt bè kờp dŭ lài Kes priă dà lơgar nam 2022; ală Kơrnoăt bè gùng dà broă lơh krơi is bơtàu tơnguh ƀòn dờng Hải Phòng mờ ală càr: Nghệ An, Thanh Hoá, Thừa Thiên- Huế; Kơrnoăt bè rơndăp ù tiah ngui ù dà lơgar tơngai bơh nam 2021- 2030, bơta wèt sền tus nam 2050 mờ broă rơndăp lơh ngui ù 05 nam tơngai bơh nam 2021- 2025.

Tơnơ̆ hơ̆, Quốc hội pơrjum dơ̆ tơn jơh Pơrjum dơ̆ 2, Quốc hội khoă XV. Tàm mho ngai 12/11, mờ uă ngan kuang bàng ring bal, Quốc hội neh pờ tê ring bal Kơrnoăt bè Broă rơndăp lơh rơndăp tăp sèng wơl rài lơh sa tơngai bơh nam 2021- 2025. Jăt mờ hơ̆, jơnau kờñ tus nam 2025, lơh ngan jơh gùt lơgar lơh geh pơgăp 1 tơlak 500 rbô mpồl lơh sa kă bro, tàm hơ̆ geh pơgăp bơh 60 rbô tus 70 rbô mpồl lơh sa kă bro lơh sa di mơ mờ dờng; bơnah tă pơgồp bơh tiah lơh sa làng bol dê tàm GDP pơgăp 55%.

Kơrnoăt bè Broă rơndăp lơh rơndăp tăp sèng wơl rài lơh sa tơngai bơh nam 2021- 2025 geh jơnau sồr: rơndăp tăp sèng wơl rài lơh sa gơ jăt bal mờ tam gơl broă gơguh tai jăt gùng dà gàr kơ̆ kơl jăp lơh sa dờng, tơnguh uă cồng nha lơh geh, bơta niam, geh cồng nha mờ bơta pràn tàm pơrlòng, tơnguh uă bơta tơl pràn gơdờp bal mờ bơta pràn kong jai bơh rài lơh sa dê. Kơrnoăt ai tơlik ală mpồl jơnau kờñ, broă jàu tờm tus nam 2025.

 Cau mblàng Lơ Mu K’Yến