VOV4.K’ho- Pơn jat tai pơrjum dơ̆ 11, Quốc hội khóa 14, mho ngai 31/3, tềng đap bơta đơng lam bơh Chủ tịch Quốc hội pa, ồng Vương Đình Huệ, Quốc hội neh pờ tê ring bal Nghị quyết tơn jơh at gơnoar broă 3 phó Chủ tịch Quốc hội. Mờ uă ngan khà sră đùh ring bal, Quốc hội neh ring bal Nghị quyết tơn jơh at gơnoar broă 3 phó Chủ tịch Quốc hội. Quốc hội lơh nền: Tơn jơh at gơnoar broă Phó Chủ tịch Quốc hội khóa 14 gơ wèt tus mờ mò Tòng Thị Phóng, ồng Uông Chu Lưu mờ ồng Phùng Quốc Hiển. Nghị quyết do geh ai ngui ngan ngồn kờp bơh tŭ geh Quốc hội pờ tê ring bal. Pơn jat hơ̆, Ủy ban Thường vụ Quốc hội yal mat yal tơnggit tơlik mat tĕ khà nàng Quốc hội in pồ 2, 3 Phó Chủ tịch Quốc hội mờ cribơyai tàm mpồl bè jơnau kờp dŭ kuang bàng nàng pồ 2, 3 Phó Chủ tịch Quốc hội.

Ngai do, Ủy ban Thường vụ Quốc hội yal Quốc hội in cồng nha cribơyai tàm mpồl mờ mblàng lơh loh, cih dờp jơnau đơs bơh kuang bàng Quốc hội dê bè kờp dŭ kuang bàng nàng pồ 2, 3 phó Chủ tịch Quốc hội. Quốc hội pồ 2, 3 phó Chủ tịch Quốc hội mờ broă lơh đùh sră ndơp. Pơn jat hơ̆ Quốc hội cribơyai tàm hìu pơrjum bè jơnau yal broă lơh tơngai bơh nam 2016 tus nam 2021 bơh Kiểm toán dà lơgar dê.

Cau mblàng K’Duẩn