VOV4.K’ho- Pơn jat tai pơrjum dơ̆ 11, drim ngai 02/4, Quốc hội neh pờ tê ring bal Nghị quyết bè broă tơn jơh at gơnoar broă Thủ tướng Chính phủ lơgar Cộng hoà Xã hội Chủ nghĩa Việt Nam gơwèt tus mờ ồng Nguyễn Xuân Phúc. Nghị quyết geh Quốc hội ring bal mờ uă ngan kuang bàng Quốc hội ring bal. Ala mat Quốc hội, Chủ tịch Quốc hội, ồng Vương Đình Huệ jơh nùs ưn ngài mờ pà bơkàu ồng Nguyễn Xuân Phúc in.

Lài hơ̆, Tổng Bí thư, Chủ tịch lơgar, ồng Nguyễn Phú Trọng neh sền sră yal tềng đap Quốc hội. Sră yal đơs loh, tàm pơrjum dơ̆ 1 Quốc hội khóa 14, ồng Nguyễn Xuân Phúc geh Quốc hội pin dờn pồ lơh Thủ tướng. Tàm tơngai at gơnoar broă, Thủ tướng Chính phủ, ồng Nguyễn Xuân Phúc sùm lơh gơs niam ngan kơnòl broă geh jàu. Gơtùi gŏ tơngai lơh broă bơh nam 2016 tus nam 2021 là dùl tơngai lơh broă kuơmàng, Chính phủ neh đơng pơlam dà lơgar Việt Nam lòt gan ală bơta kal ke, lơh geh ală cồng nha niam bơnĕ.

Kung tàm drim ngai 02/4, Ủy ban Thường vụ Quốc hội yal Quốc hội tơn jơh at gơnoar broă Chủ tịch lơgar; ală kuang bàng bơyai lơh đùh sră ndơp mờ iat Ủy ban Thường vụ Quốc hội yal mat cau tơlik mat tĕ khà nàng Quốc hội pồ Chủ tịch lơgar.

Cau mblàng K’Duẩn