VOV4.K’ho- Mho ngai 04/01, cribơyai tàm mpồl bè jơnau rơcang cih Nghị quyết broă lơh nam priă jền, broă lơh priă jền nàng dong kờl Broă lơh bơtàu tơnguh wơl mờ bơtàu tơnguh lơh sa- mpồl bơtiàn, ală kwang bàng ring bal pal ai tơlik broă lơh nam priă jền, broă lơh priă jền kờñ bơtàu tơnguh wơl, bơtàu tơnguh mhar lơh sa kă bro; sền gàr rài kis mpồl bơtiàn. Bulah bè hơ̆, ờ uă kwang bàng kung ai tơnggŏ bơta kơlôi rơcang bè broă lơh nam priă jền, broă lơh priă jền tŭ geh lam lơh jat ngan ngồn den digơlan lơh gơlik bơta gơguh ờ geh ngan bè priă jền, gơguh jơnhua ờ geh ngan khà priă ù tiah, hìu đam. Bơdìh hơ̆ tai, sồr broă lơh nam priă jền, broă lơh priă jền pal tơrgùm tàm ală gah, ală broă lơh kờñ geh pơn jờng tơnguh jơnau kờñ, geh kuơ lơh gơ rề uă. Ală kwang bàng kung đơs là, ờ hềt geh bơta ring bal đah broă lơh nam priă jền, broă lơh priă jền tàm jơnau rơcang cih Nghị quyết nàng dong kờl Broă lơh bơtàu tơnguh wơl mờ bơtàu tơnguh lơh sa- mpồl bơtiàn.

Cribơyai tàm mpồl, Củ tịc lơgar ồng Nguyễn Xuân Phúc sồr bơ tơl mpồl broă lơh lơh tơnguh cồng nha ngui kes priă dà lơgar, gàr niam tă dia dà lơgar kơ̆ kơljap, tơnguh bơta loh làng bơh kes priă dê mờ tơnguh gơnoar tam pà priă jền bơh dia dê. Ồng Nguyễn Trường Giang, Mpồl kwang bàng Quôk hội càr Dăk Nông ring bal mờ gùng dà ờ sa priă, tơrmù 2, 3 bơta priă dia, priă tă lơh broă, tàm hơ̆ geh tơrmù priă dia gơguh uă 2% ngui ai ală bơta phan kong priă dia 10%. Bulah bè hơ̆, ồng Nguyễn Trường Giang sồr pal kờp sền cau geh ngui, tơrgùm tàm ală gah, ală broă lơh kờñ pal geh pơn jờng tơnguh jơnau kờñ, geh kuơ lơh gơ rề uă. Ală kwang bàng kung sồr, tŭ Nghị quyết geh ring bal, Cíñ phủ mờ ală Ƀộ, gah broă lơh hơ pơrgon, lơh loh kơnòl broă cíñ trị, kơnòl mblàng lơh loh, tam gơl gơs kơnòl cau dùl nă să, ngan là kơnòl cau atbồ tàm broă đơng lam, pơlam mờ gròi sền broă lam lơh broă lơh dong kờl, gàr di jơnau kờñ, pleh sơmờm broă dong kờl, gàr niam cồng nha mờ bơta lam lơh ngan ngồn.

Tơnơ̆ mờ tŭ neh iăt Cíñ phủ yal jơnau yal bơh 3 rơndăp broă cih Nghị quyết mờ 1 rơndăp broă cih adăt bơh lam tàm pơrjum ni sơna bơh Quốk hội khoă 15, Mpồl kwang bàng ala măt Quốk hội càr Dăk Lăk ring bal mờ đơs niam ală rơndăp broă lơh neh di tŭ ai geh tơngu me kuơ màng, mhar tus mờ broă brồ guh mờ tơnguh bơtàu broă lơh sa mpồl bơtiàn. Ală kwang bàng kung pơgồp jơnau đơs tàm rơndăp broă cih nghị quyết bè broă lơh niam priă jền, priă nàng dong kờl broă brồ guh mờ tơnguh bơtàu lơh sa mpồl bơtiàn.

                 Kwang bàng Quốc hội càr Dăk Lăk gam pơrjum pờ tơlik tàm internet

Mơya, kwang ala măt Quốk hội càr Dăk Lăk mò Lê Thị Thanh Xuân tơlik nùs nhơm ờ sŭk ngan bè ală khà kờp geh ai. Bè tơngai lơh jăt ală broă lơh, mò Nguyễn Thị Thu Nguyệt đơs là, tŭ geh ai ală broă lơh do mờ tơngai lơh jăt tàm 2 nam là ờ uă, den tàng jơnau kờñ geh đơs tus pal mùl màl: “Broă lơh jăt bè lơi nàng gàr geh cồng nha geh tơngu me geh ai, den cíñ phủ pal geh ală broă kơlôi sơnơng sền gròi lơh jăt ndrờm bal mờ geh tơngai lơh bè lơi? Dơ̆ bàr là, pal rơwah ală broă lơh geh ai lài nàng lơh jăt ală broă lơh do den hơ̆ sồng gàr niam di mờ jơnau kờñ. Bè hơ̆, den dan geh jơnau sơndờp ngan mờ tơrgùm bal ngan Cíñ phủ pal sền gròi mờ ai geh ală gùng dà, ală broă gơtìp kal ke, ală kal ke mờ pal lơh bè lơi nàng lơh gơs tàm 2 nam”.

Cau mblàng K’Duẩn mờ Ndong Brawl