VOV4.K’ho- Neh geh tŭ là tiah gơtìp kòp sơnrờp mờ dờng ngan càr Dăk Lăk dê, mờ 51 nă cau F0, tŭ do tàm ƀòn Ea Bhok, xã Ea Bhok, kơnhoàl Cư̆ Kuiñ neh rơlao 25 ngai ờ geh cau gơtìp kòp pa. Jơh ală cau F1 neh jơh tơngai tam cah is mờ neh geh 44 nă cau kòp geh sơm bời mờ rê bơh hìu sơnơm. Rài kis bơh làng bol tàm ƀòn Ea Bhok gam rơhời geh wơl mờ ală broă lơh bè ờs pah ngai.

Cèng nha tơngời nàng ai kơnrồ in sa, ồng Y Doen Mlô, kis tàm ƀòn Ea Bhok, xã Ea Bhok, kơnhoàl Cư̆ Kuiñ, càr Dăk Lăk rơcang lòt còp sre tai. Ală broă do mìng pa geh lơh wơl bơh ồng Y Doen Mlô dê tàm 1 poh do.

                                           Mò H' Noen Ksor bal mờ ală sao pràng kòi

Lài mờ hơ̆, tàm lồi nhai 7 lài do, hìu nhă ồng geh 9 nă cau ndrờm gơtìp kòp Covid-19; tàm hơ̆ geh 2 nă ùr bơklao ồng Y Doen Mlô bal mờ 3 nă cau kòn mờ 4 nă sao. Tus tŭ do, mìng gam pơ-ùr ồng gam sơm kòp, 8 nă cau gam tai tàm hìu neh geh sơm bời mờ kung neh jơh 14 ngai tam cah is tàm hìu tơnơ̆ mờ tŭ neh rê bơh hìu sơnơm. “Rê tus hờ hìu gŏ chờ hờp ngan, bơta pràn kơl dang să jan añ dê neh bè ờs wơl. Suơn sre, sur, kơnrồ kung geh cau dong kờl, sền gàr, añ rê den chờ ngan, kòi tàm sre gam lik, añ kung ưn ngài uă ngan”.

Kung ndrờm mờ ồng Y Doen Mlô dê sơl, mò H’ Noen Ksor gơs cau gơtìp kòp Covid-19 tàm ngai 22 nhai 7 lài do tŭ tìp rềp mờ cau kis rềp bal là F0 tàm ƀòn. 5 nă cau ndai tàm hìu mò gơs cau F1 mờ pal lòt tam cah is tơrgùm bal 21 ngai.

                   Ồng Y Doen Mlô rê wơl mờ rài kis bè ờs tơnơ̆ mờ tŭ neh sơm bời kòp Covid-19

Rê wơl mờ rài kis bè ờs tơnơ̆ mờ dùl nhai nggùl sơm kòp mờ tam cah is tài bơh kòp Covid-19, mò H’ Noen Ksor git loh rơlao bè bơta kuơ bơh rài kis dê mờ git rơlao bè broă rơcang sơndră mờ kòp gơtờp: “Bác sĩ bơto tŭ rê tàm hìu, bañ lòt tàm tiah lơi mìng ơm tàm hìu, bañ tìp mờ ală cau lơi, tàm hơ̆ geh bal oh kòn tàm hìu, pal tam cah is, piang, biăp, phan sa, phan hùc oh kòn tàm hìu neh trŭ sin den cèng añ in, 2, 3 ngai tơnơ̆ mờ tŭ rê tàm hìu kung geh bác sĩ tus kham. Tŭ do den añ neh pràn kơl dang, cau sồr tus tàm xã nàng lơh sră lòt rê, lòt lơh broă tàm suơn tàm mìr. Tŭ do añ hơ̆ sồng khin lik bơdìh nàng lơh sră nggal, di lah ờ tàm ală ngai lài añ ờ khin lòt tàm tiah lơi. Tŭ do, añ neh pràn rơlao uă ngan. Añ dan ưn ngài tus mờ ală bác sĩ neh jơh nùs sơm kòp añ in”.

Ồng Đào Huy Cường, kuang atbồ ƀòn Ea Bhok pà git, ngai 19 nhai 7 lài do, tŭ ƀòn gŏ cau gơtìp kòp sơnrờp ngan là cau tàm ƀòn rê bơh càr Bình Dương, den mìng 3 ngai tơnơ̆, khà cau gơtìp neh gơguh tus 36 nă; mờ tơnơ̆ mờ 10 ngai, gùt ƀòn geh gŏ 51 nă cau gơtìp kòp. 70 hìu làng bol gơtìp aniai tài geh cau tàm hìu là F0 mờ F1. Nàng rơcang kơrian mờ kòp Covid-19 gơtờp, uă broă lơh pràn geh gơnoar atbồ xã lơh jăt bè: wàng se, kơrian jơh gùt ƀòn Ea Bhok, ngui Chỉ thị sồ 16 tàm gùt xã. Bal mờ hơ̆, broă dong kờl tus mờ rài kis broă lơh sa làng bol in kung geh lơh di tŭ, gàr niam broă bañ geh hìu lơi gơtìp jơgloh, hìu lơi gơtìp ờ tơl sa tàm tơngai ƀòn lơh jăt broă wàng se nàng kơrian kòp gơtờp.

                                          Rài kis neh bè ờs wơl làng mờ ƀòn Ea Bhok

Jăt ồng Đào Huy Cường, kuang atbồ ƀòn Ea Bhok yal, kơnờm mờ broă ring bal dùl nùs bơh làng bol, broă tus bal pràn bơh gơnoar atbồ xã, tus tŭ do, ƀòn Ea Bhok neh rơlao 25 ngai ờ geh cau gơtìp kòp pa, 44 nă cau kòp Covid-19 neh geh sơm bời rê bơh hìu sơnơm mờ lơh gơs tơngai tam cah is tơnơ̆ mờ sơm kòp. Ală tiah wàng se, kơrian rơcang sơndră mờ kòp gơtờp kung neh geh tă sờr, rài kis làng bol neh rơhời bè ờs wơl. “Tŭ do, sơn dờm wơl rài kis neh tus wơl den pa do neh dờp geh jơnau yal bơh anih bơto poulam broă lơh sa xã bè broă dong kờl làng bol ờ uă broă lơh kỹ thuật nàng bơsong mờ kòp phan tam in tơnơ̆ mờ dùl tơngai jŏ ờ lòt lơh broă. Geh dùl broă bơto sồr mùl màl bơh tơl bơta sơnơm sơm kòp bơta lơi in tàm kòi, ko8phe, tiêu nàng làng bol lơh ngan lòt lơh broă sa mờ geh cồng nha uă ngan nàng pleh mờ bơta aniai tus mờ làng bol in”.

Ồng Nguyễn Văn Dũng, Chủ tịch UBND xã Ea Bhok, kơnhoàl Cư̆ Kuiñ, càr Dăk Lăk pà git: Bal mờ broă dong kờl làng bol rơcang sơndră mờ tu, kòp lơh aniai phan tam, brồ guh wơl broă lơh sa suơn sre tàm tơngai ƀòn gơtìp wàng se, kơrian mờ kòp gơtờp, gơnoar atbồ xã kung hòi jà ală cau geh nùs nhơm niam tơnguh broă pà phan ngui, phan sa ai ală hìu rơƀah in tài gơtìp bơh kòp Covid-19 nàng ală hìu do gờñ ring niam rài kis. Ală broă dong kờl kung neh geh xã lơh jăt di tŭ: “Xã kung neh dan mờ Huyện ủy, UBND dong kờl tơl nă cau F0 bè hơ̆ là 10 kĭ phe, cau F1 là 5 kĭ phe. Ală cau lơh broă khăt gơboh rê tàm ƀòn den xã gam lơh jăt Nghị quyết sồ 68 nàng dong kờl làng bol di tŭ geh priă nàng làng bol pơn jăt tai lơh broă sa tàm ƀòn lơgar mờ pơn jăt tai lam sồr làng bol bañ ờ sền gròi, sền ờ sơ̆p, lơh jăt niam jơnau bơto sồr 5K bơh Bộ Y tế dê”.

Bơh dùl tiah gơtìp kòp Covid-19 dờng ngan sơnrờp tàm càr Dăk Lăk, gơnoar atbồ bal mờ gah lơh broă geh gơnoar lơh jăt ală broa nàng kơrian kòp pràn ngan, di tŭ, tus tŭ do rài kis bơh làng bol tàm ƀòn Ea Bhok, xã Ea Bhok, kơnhoàl Cư̆ Kuiñ gam rơhời rê bè ờs wơl. Mơya, tềng đăp mờ kòp Covid-19 pơn jăt tai gam gơtìp kal ke, làng bol bañ sền ờ sơ̆p, ờ sền gròi; mờ pal lơh jăt nền nòn ală kơrnoăt rơcang sơndră mờ kòp gơtờp.

Cau cih Nam Trang-Cau mblàng Ndong Brawl