VOV4.K’ho- Tềng đap bơta kòp Covid-19 gơlik geh kal ke tàm ƀòn dờng Hồ Chí Minh mờ bàr pe càr tiah đah Jum dà lơgar, gĭt nđờ rơbô nă cau neh rê wơl tàm ƀòn lơgar mờ rơndeh măy tàm gơl gùng rơndeh dờng 14. Geh ală cau rê tàm Tây Nguyên mơya kung geh uă cau rê tus tiah tàm gùl lơgar ngài ngan. Sơr lèt gĭt nđờ rơhiang kơi sồ mờ rơndeh măy, geh tŭ jơh bal rơbô kơi sồ, mờ uă ngan phan pơndiang, geh tŭ geh bal kơnòm dềt, ờ kờp trồ mang jơngo mờ mìu càl, khi mìng kơ̆p kờñ rê tus tàm ƀòn ờdo ờdă. Tàm gùng rê hơ̆, cau lơh broă neh geh mpồl lơh broă geh gơnoar dong kờl bè phan ngui sa, xăng zờu, sền gròi să jan, mơkung kham sac rơwah nàng ai ơm yah ngài ală cau geh gơrềng tus kòp Covid-19.

Anih gròi sền kòp Cai Chanh, gơwèt kơnhoàl Dak R’lấp, càr Dak Nông là mpồng lik mut bơh sơnrờp tàm gùng rơndeh dờng 14 tus ală càr tàm tiah Tây Nguyên, den do kung là tiah kong kơn jơ̆ kơn jŭt ngan tài bơh mpồl cau rê tàm ƀòn ngai sơlơ gal ngan. Nàng kờñ tơrmù ƀà bơta gơ kòl gùng, lơh bơtờp kòp, mpồl lơh broă geh gơnoar neh mhar ngan tàm pà gùng lòt, mơkung gròi sền bơta pràn kơl dang să jan nàng sac rơwah, ai ơm yah ngài tŭ kờñ pal geh. Ồng Phan Nhật Thanh, Chủ tịch UBND kơnhoàl Dak R’lấp pà gĭt:

Tàm anih gròi sền kòp Cai Chanh bơh kơnhoàl Dak R’lấp dê, bol añ ai tai mpồl cau lơh broă, mblàng yal, gròi sền mờ yal tiah lòt rê. Tàm tơngai pa do bulah khà cau rê uă ngan mơya làng bol kung lơh jat niam ngan, lòt yah ngài jat jơnau sồr. Mờ ală Kuang bàng lơh kơnòl broă tàm Anih gròi sền kòp Cai Chanh kung sùm tàm pơdờn bal mờ gơ̆p lơh broă dùl ngai 3 dơ̆. Ală tiah gùng gơ kòl bol añ ai tai ling griăp ƀòn, Kuang bàng lơh sơnơm mờ Kuang bàng công chức tàm xã rềp bal tus dong kờl tai.

Anih gròi sền kòp rơbàng 110 Gia Lai dong kờl piang hộp ai làng bol in

 Jat tơrgùm kờp bơh gah lơh broă geh gơnoar càr Dak Nông bơh tŭ ală càr tiah đah Jum dà lơgar lơh jat broă lơh ai ơm yah ngài mpồl bơtiàn, pah ngai kờp bal geh rlau 5 rơbô nă cau đì rơndeh măy rê tàm ală càr tàm tiah Tây Nguyên. Tàm Dak Nông ală ngai rềp do làng bol bơh ală càr rê gơguh mờr 1 rơbô nă cau.

Mho mang ngai 29/7 pa do, pơgap 900 nă cau lơh broă bơh càr Đồng Nai neh rê tàm Dak Lak mờ rơndeh măy. Khà cau lơh broă do neh cih mat dan rê bơh anih lơh broă geh gơnoar càr Đồng Nai dê mờ mìng geh rê tơnơ̆ tŭ geh test mhar ờ bơtờp kòp Covid-19 nàng gàr niam broă ờ duh pal ơm wơl tàm ală anih gròi sền kòp. Ală mpồl lơh broă geh gơnoar càr Đồng Nai neh ai mpồl lam gùng tàm gùng lòt jòng mờr 400 kơi sồ, mơkung ai rơndeh lơh mrềt pơndiang phan sa, phan ngui sa drơng ai mpồl in. Gùng lòt jơh ngai mang tàm bơta trồ mìu, tŭ tus Dak Lak, mpồl lơh broă geh gơnoar ală tiah dê neh tus dờp ală làng bol do mờ jun rê tàm Hìu bơsram kấp pe dân tộc nội trú Nơ Trang Lơng, ƀòn dờng Buôn Ma Thuột nàng lơh ală sră pơ àr kờñ pal geh.

Poh lài, tàm gơl gùng dờng 14, sùm geh uă mpồl cau rê bơh ƀòn dờng Hồ Chí Minh mờ bàr pe càr tiah đah Jum dà lơgar rê wơl tàm ƀòn. Geh ală cau rê tàm tiah Tây Nguyên, mờ geh uă cau rê tàm tiah tàm gùl lơgar ngài ngan. Tơnơ̆ tŭ lòt gan càr Dak Nông, Dak Lak, mpồl cau do tìp anih gròi sền kòp Covid-19 tàm rbàng 110, kơnhoàl Chư Pưh, càr Gia Lai. Tàm do, ồng Hồ Văn Thanh gam bal mờ gơ̆p bơyô đìh rơndeh bal bơh ƀòn dờng Hồ Chí Minh rê tàm càr Kon Tum pà gĭt:

Añ bơh càr ndai rê, Kuang bàng tàm do lơh broă jơh nùs ngan, ai bol añ in xăng zờu, dà hùc, bung mi, ƀañ ƀùñ. Añ ưn ngài ngan nùs nhơm bơh càr Gia Lai dê.

Bơto pơlam làng bol mut tàm Anih gròi sền kòp rcang sơndră kòp Covid-19 Sao Mai

Jat Trung tá Nguyễn Minh Tuấn, Kuang atbồ mpồl Kảnh sát gùng lòt sồ 1, Kuang àng càr Gia Lai yal, tàm ală ngai do, geh uă ngan cau mờ rơndeh rơndồ rê bơh tiah kòp. Tơnơ̆ tŭ yal tơngĭt tiah lòt rê, làng bol geh rơndap tiah ơm rlô bòl, geh phan sa, phan ngui, dà hùc drơng ờ sa priă. Tơnơ̆ hơ̆, mpồl lơh broă geh gơnoar bơto pơlam lòt gùng nàng rê tàm ală tiah gơ in ƀuơn ƀoài. Trung tá Nguyễn Minh Tuấn đơs:

Tŭ do, bè ală ngai lơh broă uă den làng bol tàm ală tiah kòp rê den bol añ jun lòt ơm yah ngài bơh 500 tus 600 nă cau. Gơwèt mờ làng bol tàm ală càr ndai lòt gan càr Gia Lai kung geh pơgap 600 nă cau sơl.

Mpồl lơh broă geh gơnoar càr Kon Tum jun làng bol lòt gan càr

Gùng rê tàm hìu tàm gùng dờng 14, tŭ lòt gan jơh ù tiah càr Gia Lai, ală cau lơh broă pơn jat tai tìp anih gròi sền kòp Sao Mai- mpồng mut lik tiah đah Jum mut tàm càr Kon Tum. Bulah ờ kơn jơ̆ bè tiah bơh chờm Cai Chanh, càr Dak Nông dê, mơya kờp bal pah ngai kung geh bơh 250 tus 350 nă cau lòt gan anih gròi sền. Tàm do, ală mpồl lơh broă geh gơnoar ơm lơh broă jơh ngai mờ mang nàng wă cau rê bơh tiah kòp. Tơnơ̆ tŭ geh bơto pơlam ơm rlô bòl tàm dùl tiah, làng bol geh dong kờl dà hùc, piang hộp, mbar, ƀañ ƀùñ mờ geh tuh bềng bình xăng ờ sa priă lài mờ tŭ pơn jat tai lòt gùng. Bi Lê Hương, hìu ơm tàm kơnhoàl Phú Vang, càr Thừa Thiên- Huế pà gĭt:

Oh rê bơh Phú Giáo, càr Bình Dương. Rê tus Bình Phước den bơh Bình Phước trờn rê tus tàm càr Dak Nông. Bơh càr Dak Nông lòt tus càr Gia Lai. Càr Gia Lai dong kờl tuh xăng, pà phan sa mờ dà hùc nàng rê tus tàm do. Kảnh sát gùng lòt càr Kon Tum tàm do geh dong kờl oh in tuh xăng, phan sa mờ dà hùc sơl.

Tềng đap ală bơta kal ke, bòl glar bơh ală cau công nhân, cau lơh broă, cau lơh broă khat gơboh dê tàm gùng rê bơh tiah kòp Covid-19 đah Jum dà lơgar rê wơl tàm ƀòn, bal mờ gơnoar atbồ ală càr tàm tiah Tây Nguyên, uă mpồl cau, cau dùl nă să is tàm ală tiah kung neh dong kờl is tă pơgồp bal pah ngai gĭt nđờ rơhiang bơnah phan sa ờ sa priă kung bè bàr pe phan ngui sa kờñ pal geh nàng dong gùng rê bơh cau lơh broă dê geh ƀuơn ƀoài mờ ờdo ờdă rlau tai.

Jat VOV Tây Nguyên- Cau mblàng K’Hạnh