VOV4.K’ho- Ngai 20/12, tàm ƀòn dờng Buôn Ma Thuột, Mpồl cau chài cùp rùp Việt Nam pơgồp bal mờ Ủy ƀan Ñân zân càr Dăk Lăk mờ Mpồl Văn học nghệ thuật càr Dăk Lăk bơyai lơh sơnđờm Ràng tơlik pơrlòng rùp niam chài tiah đah jum tàm gùl lơgar mờ Tây Nguyên dơ̆ 26 nam 2021.

Năc lòt còp sền ràng tơlik rùp tàm Bảo tàng Dăk Lăk

Ràng tơlik pơnđàng 172 pang rùp bơh ală cau chài cùp rùp dê tus bơh Mpồl Văn học nghệ thuật 10 càr mờ ƀòn dờng tàm kơnhoàl ù tiah do, tàm hơ̆ geh: Đà Nẵng, Quảng Nam, Quảng Ngãi, Bình Định, Phú Yên, Khánh Hòa, Dăk Lăk, Dăk Nông, Gia Lai mờ Kon Tum. Ală pang rùp cùp geh cùp dùl bă song dơ pă, ngan ngồn rài kis, lơh broă- lơh sa; rơcăng sơndră kòp Kovid-19 bơh tơl tiah dê. Ală broă lơh, dơ̆ lơh chờ niam chài halà ală broă lơh đơs crih tam ya gơcèng bềng rài kis niam chài is bơh yau bơh ală jơi bơtiàn kòn cau dùl êt nă cau dê kung geh wăc sềr wơl dùl bă ngan ngồn mờ niam ngan. Ràng tơlik geh bơyai lơh tàm Bảo tàng Dăk Lăk, là dùl tàm ală broă lơh gờm chờ Ngai crơng gơs Mpồl ling klàng làng bol Việt Nam, wă rò sơnam pa 2022.

Cau mblàng Lơ Mu K’Yến