VOV4.K’ho- Jat jơnau kờp dŭ lài bơh Bộ Giáo dục mờ Đào tạo dê, dơ̆ pơrlòng jơh bơsram kấp pe nam 2021 geh bơyai lơh bơh ngai 7 tus ngai 9 nhai 7 mờr tus. Dơ̆ pơrlòng nam do geh bơyai lơh tàm bơta kòp Covid-19 gơlik geh kal ke tàm jơh ală broă  bơh dơ̆ pơrlòng dê pal gàr niam bơta ờdo ờdă rcang sơndră kòp. Tàm tiah Tây Nguyên, tơngai pa do, gah bơto bơtê ală tiah neh lơh mhar tŭ tơngai nàng lơh sir broă lơh bơto bơtê ai kơnòm bơsram khối 12 in, bơyai lơh bơsram jơnau pơrlòng ai ală kơnòm bơsram in dùl bă di pal mờ geh cồng nha.

Tềng đap bơta gơlik geh kal ke bơh kòp Covid-19 dê, gah bơto bơtê càr Dak Lak gam lơh ngan lam lơh uă broă lơh bơsram, dong kơnòm bơsram ơdŭ 12 in rcang niam ngan rlau jơh ai dơ̆ pơrlòng jơh bơsram kấp pe. Nam do, càr Dak Lak geh rlau 19 rơbô 800 nă cau bơsram tus bal pơrlòng. Tàm hơ̆ geh rlau 4 rơbô 700 nă kơnòm bơsram dan cih mat pơrlòng nàng dờp jơh bơsram kấp pe, 14 rơbô 400 nă cau pơrlòng jơh bơsram kấp pe ai cồng nha sac rơwah mut bơsram Đại học, Cao đẳng. Tềng đap bơta kòp Covid-19 gơlik geh kal ke, tŭ càr Dak Lak neh geh bàr pe nă cau bơtờp kòp Covid-19, gah bơto bơtê càr Dak Lak neh rcang lài ală gùng dà broă lơh nàng bơsram mờ bơyai lơh dơ̆ pơrlòng di pal ngan rlau jơh mờ bơta geh ngan tàm tơngai geh bơyai lơh dơ̆ pơrlòng.

Gơwèt mờ kơnòm bơsram khối 12, Sở Giáo dục mờ Đào tạo neh sồr ală Hìu bơsram jat broă rơndap lơh bơto bơtê mờ bơsram rcang lài bơt bơtàu broă rơndap lơh, hòi jà jơh  bơta pràn ai broă lơh bơsram nàng pơrlòng jơh bơsram kấp pe in. Tàm hơ̆ geh, ală Hìu bơsram tam pà pơgru drơng broă jat môn halà jat ơdŭ; pơndờm pơnđiang, pà khà jờng di tŭ gơwèt mờ ală cau dùl nă să is, mpồl cau lơh niam; bơto tơngkah, sền tìs di ală cau dùl nă să is, mpồl cau sền ờ sơ̆p, ờ lơh tơl kơnòl broă tàm broă lơh jat broă bơsram. Bulah gơtìp gơrềng bơh kòp Covid-19, mơya kơnòm bơsram khối 12 tàm gùt càr kung gam lòt bơsram bè ờs pơgồp bal mờ bơsram pờ tơlik tơn tàm internet mờ gah bơto bơtê càr Dak Lak neh rcang ală broă lơh, tơngume bơto bơtê mờ bơsram tàm tơngai kòp Covid-19, tŭ kờñ pal geh là lơh tơn. Ồng  Phạm Đăng Khoa, Kuang atbồ Sở Giáo dục – Đào tạo càr Dak Lak pà gĭt:

Bol añ gam sồr ngan ală hìu bơsram tàm broă bơyai lơh bơsram, mơkung gam lơh ngan cribơyai bal mờ UBND càr bè broă crơng gơs Mpồl đơng lam pơrlòng kấp càr, lam lơh broă rơndap lơh bơyai lơh pơrlòng, sền gròi ală bơta bơyai lơh pơrlòng nàng dơ̆ pơrlòng in geh bơyai lơh dùl bă ờdo ờdă, niam, di mờ kơrnoat nàng bơta niam mờ cồng nha dơ̆ pơrlòng gơkờn jơh bơsram kấp pe uă rlau mờ nam bơsram 2019-2020.

Dak Lak bơyai lơh bơsram jơnau pơrlòng ai ală cau pơrlòng in

Pa do, UBND càr Lâm Đồng neh geh sră nggal ring bal gùng dà kơnòm bơsram kấp pe, học viên, cau bơsram dờng ală hìu bơsram tàm ù tiah càr dê bơyai lơh pơrlòng bơsram dơ̆ 2 mờ pal lơh sir lài mờ ngai 21/5. Tơn jơh dơ̆ pơrlòng do, ală kơnòm bơsram, học viên , cau bơsram dờng tàm ù tiah càr dê pơn jat tai ơm rlô nàng rcang sơndră kòp Covid-19. Mìng is gơwèt mờ kơnòm bơsram khối 12, UBND càr Lâm Đồng sồr Sở Giáo dục mờ Đào tạo bơto pơlam bơyai lơh pơrlòng jơh bơsram kấp pe mờ broă lơh pờ tơlik tơn tàm internet. Gơwèt mờ ală tiah kal ke, tiah làng bol kòn cau, ờ geh tơl phan bơna, măy mok nàng bơsram pơrlòng pờ tơlik tơn tàm internet den gơtùi bơyai lơh bơsram pơrlòng tơrgùm bal mơya pal pơs wàs, ƀồm sơnơm lơh kloh khuẩn hìu bơsram, ơdŭ bơsram, phan bơna, phan ngui bơto bơtê lài mờ tŭ ai kơnòm bơsram tus hìu bơsram. Tàm tơngai ală kơnòm bơsram tus hìu bơsram, bañ tơrgùm uă ir 30 nă kơnòm bơsram dùl ơdŭ mờ pơn chèu glòm muh mat, ƀồm sơnơm lơh kloh khuẩn, yal tiah lòt rê mờ gah lơh sơnơm, ơm yah ngài, lơh jat niam ală jơnau sồr bè rcang sơndră kòp.

Tàm dơ̆ pơrjum bơh Mpồl đơng lam kấp dà lơgar dơ̆ pơrlòng jơh bơsram kấp pe nam 2021 pa do, Thứ trưởng Bộ Giáo dục mờ Đào tạo ồng Nguyễn Hữu Độ, Kuang atbồ Mpồl đơng lam sồr tàm cau tàm ală mpồl lùp sền pal geh bơta pơgồp bal bơh mpồl lơh sơnơm dê. Do là jơnau sồr kuơ màng ngan, tài bơh dơ̆ pơrlòng nam do geh bơyai lơh tàm bơta kòp Covid-19 geh bơta gơlik geh kal ke den jơh ală broă bơh dơ̆ pơrlòng dê pal gàr niam bơta ờdo ơdă rcang sơndră kòp. Jat jơnau yal bơh ồng Nguyễn Đức Cường, Chánh Thanh tra Bộ Giáo dục mờ Đào tạo, dơ̆ pơrlòng nam do kung gam gàr niam bơta bè ờs, tàm đòm jat bal mờ geh bơta tam gơl pa ai gơ in di pal mờ bơta bơyai lơh dơ̆ pơrlòng tàm tơngai kòp gơlik geh kal ke. Jat hơ̆, ai bơta mờng chài bơh dơ̆ pơrlòng nam 2020, broă lơh lùp sền, sền gròi jơh ală broă bơh broă bơyai lơh pơrlòng nam 2021 geh lơh jat bơh dà lơgar tus jơh ală tiah. Gơwèt mờ ală tiah geh khà kơnòm tus bal pơrlòng uă, ală dơ̆ pơrlòng lài mờ tŭ gơlik geh uă broă nam do geh bơyai lơh lùp sền, sền gròi niam ngan bơh broă rcang lài ai dơ̆ pơrlòng in. Ồng  Nguyễn Đức Cường, Chánh Thanh tra Bộ Giáo dục mờ Đào tạo pà gĭt:

Bè broă lơh ai điềm pơrlòng den do là tam gơl di pal ngan rlau jơh, jat jơnau sồr bơh Adat Thanh tra dê den nam do ala tài bơh broă bơyai lơh sền gròi broă ai điềm pơrlòng den jơh tàm tơngai ai điềm pơrlòng mờ broă kung gam bơyai lơh sền gròi broă ai điềm pơrlòng tàm jơh tơngai Mpồl duh broă ai điềm pơrlòng. 63 mpồl lòt sền bơh Bộ dê tàm 63 Mpồl duh broă ai điềm pơrlòng tàm jơh tơngai ai điềm pơrlòng nàng gàr niam bơta ring bal. Ală mpồl do den bol añ kung gam hòi jà ală mpồl bơh Bộ mờ ală cau pơgru bơto đại học tus bal.

 Jat jơnau tơrgùm kờp bơh Bộ Giáo dục mờ Đào tạo dê, tus tŭ do geh rlau 1 tơlak nă cau pơr lòng dan cih mat tus bal pơrlòng jơh bơsram kấp pe nam 2021, tàm hơ̆ geh rlau 41 rơbô nă cau pơrlòng khat gơboh. Tàm khà rlau 1 tơlak nă cau pơrlòng cih mat dan pơr lòng jơh bơsram kấp pe nam do, geh rlau 222 rơbô nă cau pơrlòng mìng sac rơwah jơh bơsram kấp pe, rlau 33 rơbô nă cau pơrlòng mìng sac rơwah mut bơsram đại học, cao đẳng. Ală cau pơrlòng pa jơh bơsram kấp pe pa sac rơwah là rlau 758 rơbô nă kơnòm, geh tus 74%. Ală cau pơrlòng sac rơwah jơnau pơrlòng khoa học xã hội kung gam uă ngan mờ rlau 541 rơbô nă cau pơrlòng.

Quốc Học tơrgùm wơl- Cau mblàng K’Hạnh