VOV4.K’ho- Jat khà kờp geh tơrgùm bơh ală tiah dê, gùt lơgar geh 69 tơlak 198 rbô 594 nă cau lơh jat gơnoar tĕ khà Kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026 tàm ngai 23/5 do. Mpồl duh broă tĕ khà dà lơgar pa do neh geh sră nggal ai gơnoar 2, 3 tiah đùh sră tàm 2 càr là Kon Tum mờ Dak Lak geh bơyai lơh tĕ khà gờñ rlau pơndrờm mờ ngai tĕ khà 23/5/2021 neh geh Quốc hội lơh nền.

Tàm càr Kon Tum, Mpồl duh broă tĕ khà dà lơgar ring bal ai gơnoar ală anih đùh sră tàm ngai 22/5 tàm ală xã Ngọc Linh, Mường Hoong, Đăk Man, Đăk Plô, Đăk Nhoong, Đăk Long gơwèt kơnhoàl Đăk Glei mờ Pôs ling sền gàr tiah nhàr dà lơgar xã Đăk Xú bơh xã Đăk Xú, kơnhoàl Ngọc Hồi dê gờñ rlau 1 ngai pơndrờm mờ ngai tĕ khà gùt lơgar.

Tàm Dak Lak, Mpồl duh broă tĕ khà dà lơgar ring bal ai gơnoar ală anih đùh sră gờñ rlau 1 ngai gơwèt tus mờ ală mpồl ling tàm kơnhoàl Ea Súp, kơnhoàl Buôn Đôn mờ ƀòn dờng Buôn Ma Thuột.

Cau mblàng K’Duẩn