VOV4.K’ho- Mho ngai 01/8, ồng Nguyễn Văn Nên- Bí thư Thành ủy Hồ Chí Minh mờ ồng Nguyễn Thanh Long- Bộ trưởng Bộ Y tế neh lòt sền broă lơh ală Anih tờm Sơm kòp mờ sền gròi jơh nùs ai cau kòp Covid-19 in. Bộ Y tế sồr mhar dờp cau kòp Covid-19 tàm 4 anih tờm sơm kòp mờ sền gròi jơh nùs do; jàu Hìu sơnơm Đại học Y dược ƀòn dờng Hồ Chí Minh in dờp lơh kơnòl broă ờs mờng tàm do. Tiah sơm kòp ai cau kòp Covid-19 in geh ngui bơh ală phan bơna neh geh lài bơh hìu sơnơm dê, bè măy tă nhơm, jơnờng piam kòp.

Kuang đơng lam bồ ƀòn dờng Hồ Chí Minh mờ Bộ Y tế lòt sền ală anih lơh Anih tờm Sơm kòp mờ Sền gròi jơh nùs  

Tềng đăp măt geh 70 nơm jơnờng, digơlan geh tơnguh tus 500 nơm jơnờng sơm kòp mờ sền gròi. Sơnđờm bơh ngai do (02/8), hìu sơnơm geh sơnđờm dờp cau kòp Covid-19. Mpồl lơh broă kung neh lòt sền Khoa Sơm kòp mờ Sền gròi jơh nùs geh 500 nơm jơnờng piam kòp tàm Hìu sơnơm ing sồ 16 geh lơh tàm quận 7, ƀòn dờng Hồ Chí Minh, tiah hìu sơnơm Bạch Mai gam geh jàu kơnòl đơng lam. Bí thư Thàng ủy Hồ Chí Minh ồng Nguyễn Văn Nên tơngkah pal tơrmù mhar ală sră pơ àr dùl bă jơh nùs ngan rlau jơh, bơtơl mhar ngan rlau jơh ală bơta lơi gam ờ hềt tơl nàng ală anih tờm do in dờp tơn cau kòp kơn jơ̆ mŭt sơm kòp.

Cau mblàng Lơ Mu K’Yến