VOV4.K’ho- Cơldŭ lơh broă Thường trực Mpồl đơng lam dà lơgar bè rơcang sơndră trồ tiah lơh aniai pa geh sră nggal pơyua Mpồl đơng lam rơcang sơndră trồ tiah lơh aniai mờ jòi dong kờl rềs àr ală càr, ƀòn dờng tiah kềng gah dà lềng bơh Quảng Ninh tus Bình Thuận mờ tiah đah tô dà lơgar; ală Bộ: Nông nghiệp mờ Phát triển Nông thôn, Y tế, Quốc phòng, Kuang àng, Giao thông Vận tải mờ Công thương lam lơh ală broă rơndap lơh rơcang lài sơndră mờ càl rbut dờng geh mat sơnđan dunia là Conson mờ mìu sơr.

Tơngume sră nggal pơyua sồr Mpồl đơng lam rơcang sơndră trồ tiah lơh aniai mờ jòi dong kờl rềs àr, ală Bộ, gah broă lơh, ală càr, ƀòn dờng pa yal đơng lam kờp sền rơndap broă rơcang sơndră mờ lam lơh broă lơh rơcang sơndră trồ tiah lơh aniai tàm tŭ tơngai kòp bơtờp Covid-19 jat jơnau đơng lam bơh Thủ tướng Chính phủ dê, kuơmàng là rơndap broă ntrờn dô pleh gàr niam ờdo ờdă dilah gơlik geh càl rbut dờng, mìu sơr, dà kŏ dà cò dờng, ngơr bam, tơrlah ù mờ gàr niam broă rơcang sơndră kòp mờ ờdo ờdă ai ală anih ntrờn dô pleh in.

Cau mblàng K’Duẩn