VOV4.K’ho - Mho òr (18/10), Chủ tịch Quốc hội ồng Vương Đình Huệ neh lơh broă mờ Văn phòng Quốc hội mờ ală anih lơh broă gơrềng bal bè broă rơcang ală bơta bơyai lơh pơrjum dơ̆ 2, Quốc hội khoă 15 mùl màl sơn đờm tàm ngai hìng 20 nhai 10.

Jăt Tổng Thư ký Quốc hội, Chủ nhiệm Văn phòng Quốc hội yal, ală tơngu me Dơ̆ pơrjum neh tơl bơta yal mờ Quốc hội. broă rơcang bè jơnau tơngit, lam sồr, phan bơna, kỹ thuật, bơta lơngăp lơngai, broă wă năc, broă dong kờl, broă rơcang sơndră mờ kòp gơtờp... neh geh lơh sir nàng rơcang drơng pơrjum. Pơrjum dơ̆ do lơh ngan rơndăp să sèng nàng tơmù tơngai lơh broă (kờp dŭ di pơgăp 17 ngai) mơya kung gam pal gàr tơl bơta niam ală kơrnoăt hơ bơh Quốc hội geh ai gơwèt mờ broă tơnguh bơtàu dà lơgar tàm nam 2022 mờ ală nam pơn jăt tai, gàr niam ờ do ờ dă broă rơcang sơndră mờ kòp Covid-19. Tàm broă bơyai lơh pơrjum, Chủ tịch Quốc hội ồng Vương Đình Huệ sồr pal ngui uă ngan tơngai cri bơyai tàm mpồl mờ tàm hìu pơrjum dờng; pơn jăt tai tam gơl pa mờ tơnguh uă bơta niam broă lơh sră nggal, tơrgùm jơnau cri bơyai mờ mblàng ală broă geh ai bơh broă cri bơyai. Bal mờ hơ̆, Chủ tịch Quốc hội đơs tờm tus mờ broă tơnguh uă gơnoar bơh Mpồl đảng, tơnguh rơlao tai kơnòl, jơnau đơs bơh ală kuang bàng Quốc hội mùl màl ala măt bồ tơngoh, jơnau kơ̆p kờñ bơh làng bol, tài bơta kuơ bal bơh dà lơgar, cri bơyai nền nòn, kơrnoăt hơ di pal tài broă tơnguh bơtàu bal.

Cau mblàng Ndong Brawl