VOV4.K’ho - Khà cau gơtờp mờ kòp Covid-19 tàm càr Dak Lak gam gơguh ờ sŭk ngan. Geh ƀòn gŏ tus 34 nă cau gơtìp mìng tàm 1 poh. Bơdìh mờ bơta kòp gơtờp, yal ờ loh làng jơh nùs lơh gah lơh sơnơm gơtìp kal ke tàm broă gròi sền, den broă tam cah is tàm hìu ơm kung là bơta ờ sŭk ngan sơl. Tàm hơ̆ uă ngan là cau bơh tàm tiah gơtìp kòp rê hờ ƀòn lơgar tờm ngai sơlơ uă, lơh broă di gơlan gơtờp kòp ngai sơlơ uă, den tàng ală kơnhoàl, thị xã, ƀòn dờng tàm càr Dak Lak pal geh broă lơh jal mhar nàng tơmù bơta do, tơnguh uă rơlao tai cồng nha broă rơcang sơndră mờ kòp gơtờp.

Poh lài, tàm càr Dak Lak geh tai kơnhoàl Mdrăk geh gŏ mờ cau gơtòp mờ virus Sars CoV-2 sơnrờp ngan tàm dơ̆ gơtờp kòp do. Cau gơtìp kòp do bơh ƀòn dờng Hồ Chí Minh rê neh geh tam cah is 1 poh tàm hìu, tàm ƀòn 16, xã Ea Riêng. Mpồl đơng lam rơcang sơndră mờ kòp Covid-19 tàm xã do neh tam pà lơh gơs 5 mpồl, gròi sền broă lơh jăt broă tam cah is tàm hìu bơh 164 nă cau.

             Yồng jơnau yal, tơnguh broă gròi sền cau tam cah is tàm xã Ea AKênh, kơnhoàl Krông Păc

Mò Trần Thị Thanh, kuang atbồ hìu sơnơm xã Ea Riêng pà gĭt, jơh ală cau do ndrờm di pal mờ ală bơta kờñ geh cih tàm kơrnoăt tam cah is bơh Chủ tịch UBND xã dê, bè kĭ jơnau hơ tam cah is, rơcang dà lơh kloh vi khuẩn, xét nghiệm jăt tơngai tàm hìu sơnơm xã. Tơl hìu geh cau tam cah is ndrờm geh lir jơnau yal nàng mpồl bơtiàn gĭt gròi sền. Mơya, jăt mò Trần Thị Thanh yal, gam uă bơta lơh kòp di gơlan gơtờp mờ broă tơmù, gam ing hờ bơdìh broă lơh xã dê: “Xã Ea Riêng là tiah gơtìp kal ke ngan, geh hìu den geh rơcang sơndră mờ tam cah is, geh hìu den ờ lơh jăt; hìu jă brê kung ờ hềt geh tơl. Dơ̆ pe tai là bă ù lơh hìu ờ ơnàng. Dơ̆ poan tai là ờ tơl kloh niam tàm hìu nhă; hìu neh ơm bal den phan ngui kung ngui bal tơn. Bè hơ̆ den tàng broă rơcang sơndră mờ kòp gơtờp kung gam uă kal ke”.

Mpồl cau bơh ƀòn dờng Hồ Chí Minh mờ ală càr gơtìp kal ke bè kòp Covid-19 rê tus càr Dak Lak ngai sơlơ uă, yal lài broă di gơlan gơtìp kòp ngan sơlơ uă. Sơn đờm bơh broă yal ờ jơh nùs, loh làng, ờ tam cah is, dùl nă cau lơh broă tàm hìu rơndeh Buôn Ma Thuột neh lơh gơtờp kòp rơlao 10 nă cau, mờ bơh cau lơh broă tàm hìu rơndeh do là cau gơtìp aniai uă ngan, tŭ jơh 5 nă cau tàm hìu nhă ndrờm gơtìp kòp gơtờp. Pơn jăt tơn mờ hơ̆, 1 nă cau ndai, bŭ lah neh yal nền nòn, kĭ jơnau hơ tam cah is tàm hìu tàm ƀòn Ea Bhok, xã Ea Bhok, kơnhoàl Cư̆ Kuiñ, mơya tơnơ̆ mờ hơ̆ kòp kung gam gơtờp jơh tàm gùt ƀòn sơl mờ mờr 40 nă cau gơtìp.

                                Mpồl cau rê bơh ală càr đah jum tus càr Dak Lak tàm gùng 14

Ƀòn Khoá, xã Cư̆ Pui, kơnhoàl Krông Bông kung bơh 1 nă cau tam cah is tàm hìu mờ lơh gơtờp tus 14 nă cau. Ồng Trần Hồng Thái, kuang atbồ ƀòn Tân Đông, xã Ea Kênh, kơnhoàl Krông Păc pà gĭt, tàm ƀòn gơtùi sền gròi nền nòn, gàr niam cau tam cah is ờ lĭk bơdìh hìu, mơya broă gròi sền tam cah is tàm dơlam hìu là broă bơdìh mờ broă lơh: "Tàm dùl hìu mờ geh cau F1 tam cah is den cau tàm hìu nhă geh là F2. F1 ờ lĭk bơdìh hìu, mơya ală cau gùt dar, ală cau F2 gam lĭk bơdìh hìu bè ờs. Bè hơ̆ broă tam cah is bè rơgơi geh cồng nha, den jơh ală mpồl lơh broă chính trị kung gam ờ sŭk bè bơta do sơl".

Dơ̆ gơtờp kòp Covid-19 dơ̆ 3 do tàm càr Dak Lak, khà kờp rơlao 50 nă cau F0 là bơta tờm lơh gơtờp bơh 2, 3 nă cau rê bơh tiah gơtìp kòp bơdìh càr, pà gŏ broă di gơlan uă ngan mờ càr Dak Lak gam pal gơtìp. Ồng Nay Phi La, Kuang atbồ Sở Y tế càr Dak Lak pà gĭt, di lah ờ kơrian ală tiah lơh gơtờp kòp bè pa do, gah lơh sơnơm càr gơtìp gal ir cau gơtìp kòp: “Bơh 1 nă cau F0 den geh bal bơh 100 tus 150 nă cau F1 mờ rơlao 300 nă cau F2, bè hơ̆, broă jòi, xét nghiệm geh lơh gơtìp kal ke tus mờ gah lơh sơnơm. Den tàng, sơlơ kal ke tàm broă jòi den kòp sơlơ mhar gơtờp”.

Bŭ lah neh geh broă rơndăp lơh pơgồp bal mờ ƀòn dờng Hồ Chí Minh mờ ală càr hờ đah jum bè càr Đồng Nai, Bình Dương nàng ai làng bol rê hờ ƀòn lơgar tờm, mơya tus tŭ do càr Dak Lak kung gam ờ hềt lơh jăt sơl. Tàm tŭ hơ̆, gĭt nđờ rơbô nă cau bơh ală càr hờ đah jum kung gam tàm gùng 14 pơn jăt tai rê mờ rơndeh Honda. Pa do ngan, tàm mang ngai 29 nhai 7, geh di pơgăp 700 nă cau đì rơndeh Honda bơh càr Đồng Nai rê tus càr Dak Lak. Nàng gàr niam ờ do ờ dă ai mpồl cau do in, mpồl lơh broă geh gơnoar neh pal gròng jơh tàm gùng rê. Tàm tŭ hơ̆, rơndăp broă lơh bơh UBND càr Dak Lak dê là geh rò 500 nă làng bol bơh tiah gơtìp kòp rê tàm càr. Tàm hơ̆, càr tam pà loh làng ală cau geh ai lài gam gơtìp kal ke tàm tiah gơtìp kòp gơtìp kơrian. Mìng tàm 2, 3 ngai, tơrgùm jơnau yal bơh ală tiah dê mờ ală tiah geh dan cih măt tàm pang website, neh geh di pơgăp 10 rơbô nă cau tàm ală tiah gơtìp kòp dan rê. Bŭ lah bè hơ̆, jăt mò H’ Yim Kđok, Phó kuang atbồ UBND càr Dak Lak yal, tŭ do càr gam tơrgùm kơrian kòp gơtờp, den tàng kung kal ke nàng ai broă lơh jăt broă rò làng bol bơh ală càr rê. “Tŭ do càr gam lơh jăt Chỉ thị sồ 16 den tàng kal ke ngan. Dơ̆ 2 tai là bơta kòp gơtờp tàm càr pơn jăt tai geh ală bơta kal ke ngan, bè hơ̆, kung kal ke ngan nàng gàr niam ờ do ờ dă ai làng bol rê in. Tŭ do càr gam tơrgùm jơh ală bơta pràn nàng broă sơm kòp, drơng sền gàr ală cau là cau kòp mờ cau F1, F2”.

Tŭ do, ƀòn dờng Buôn Ma Thuột mờ ờ uă kơnhoàl, thị xã tàm càr Dak Lak gam gơtìp kơrian jăt Chỉ thị sồ 16. Càr ai lài broă tam dră mờ kòp gơtờp tàm càr in lài, den tàng ờ hềt gơtùi rơcang ai broă rò làng bol bơh tiah gơtìp kòp rê. Ală tiah do gam pal lơh jăt ală broă lơh ing nàng rò ală mpồl cau gam rê is mờ rơndeh Honda rê hờ ƀòn lơgar tờm. Tŭ neh rê tus tàm ƀòn lơgar, bŭ lah lơh jăt ală kơrnoăt bè yal broă lơh sơnơm, tam cah is tàm hìu, mơya mờ bơta geh mùl màl bơh tơl hìu dê, den anih lơh broă geh gơnoar kung kal ke ngan sơl nàng gròi sền.

Mùl màl pà gŏ, broă gròi sền nền nòn bơh bơdìh, chồl pràn broă xét nghiệm, jòi cau neh tìp rềp mờ cau gơtìp kòp là ờ hềt tơl nàng kơrian kòp gơtờp. Uă hìu nhă broă lơh sa gơtìp kal ke, broă tam cah is gơtìp ờ tơl, mờ uă ngan là bè jơnau gĭt wă tàm broă rơcang sơndră mờ kòp ờ hềt uă, gam là dùl bơta lơh ờ nền nòn mờ pal gờn geh càr lơh tơl. Di gơlan, bơdìh mờ broă lơh 5K rơcang sơndră mờ kòp gơtờp, pal lơh jăt, broă dong kờl nàng cau tam cah is tàm hìu lơh jăt geh 3 bơta is là sào sa jơrlŭ bơngàn is, ơm tàm anih is; mờ broă rào jơng tê, um kloh să jan is.

Cau mblàng Ndong Brawl