VOV4.K’ho- Gam ờ hềt tus 1 nhai tai, rlau 1 tơlak nă cau pơrlòng tàm gùt lơgar geh mut tàm dơ̆ pơrlòng jơh bơsram kấp 3 nam 2021. Tus tŭ do, ală tiah tàm gùt lơgar neh lam lơh ală broă lơh rơcang tus dơ̆ pơrlòng do, tàm hơ̆ tơnguh kơnòl broă bơh cau atbồ ală hìu bơsram, ală Sở, gah broă lơh, kuang đơng lam bồ ală tiah dê, wèt tus jơnau kờñ bơyai lơh dùl dơ̆ pơrlòng ờdo ờdă, nền nòn.

Tus tŭ do, ală tiah neh crơng gơs Mpồl đơng lam dơ̆ pơrlòng jơh bơsram kấp 3 nam 2021 bơh càr dê, tam pà loh làng kơnòl broă ai tơl mpồl geh gơ rềng in, tàm hơ̆ Sở Giáo dục mờ Đào tạo kong kơnòl bơt bơtàu ală jơnau rơcang lài bơyai lơh pơrlòng dipal mờ broă gơlik geh bơh kòp Covid-19. Ờ uă tiah bè Hải Phòng, Dak Lak,... gam crơng gơs mpồl đơng lam pơrlòng kấp kơnhoàl, thị xã, ƀòn dờng nàng dong kờl ai broă bơyai lơh pơrlòng bơh ală hìu bơsram tàm tiah he dê. Tàm tŭ tơngai kòp bơtờp gơlik geh kal ke, bơdìh mờ ală anih pơrlòng ngan ngồn, ală càr, ƀòn dờng ndrờm kờp dŭ crơng gơs ală anih pơrlòng lời is ai cau pơrlòng là cau F1 in nàng gàr gơnoar kuơ ală oh in. Ală anih pơrlòng ndrờm geh rơcang wil tơl phan bơna, măi mok mờ ală bơta phan rơcang sơndră kòp.

Ồng Nguyễn Văn Long, Phó Kuang atbồ Sở Giáo dục mờ Đào tạo càr Gia Lai pà git, càr geh rlau 14 rbô nă cau cih mat tus bal pơrlòng, geh bơyai lơh tàm 39 anih pơrlòng. Càr neh bơt bơtàu rơndap broă pơrlòng jơh bơsram kấp 3 mờ 4 kấp nàng sơndră mờ kòp Covid-19. Tŭ do bal mờ broă bơyai lơh pơlam tàp lơh jơnau pơrlòng ai kơnòm bơsram in, càr gam sơlơ tơnguh broă lơh mblàng yal, di tŭ yal jơnau tơnggit tus kuang bàng, cau pơgru, cau lơh broă mờ cau pơrlòng, mè bèp kơnòm bơsram in bè broă gơlik geh bơh kòp bơtờp dê mờ ală jơnau pơlam bơh anih lơh broă geh gơnoar dê bè rơcang sơndră kòp: “Sở Giáo dục mờ Đào tạo neh đơng lam ală mpồl cau, mpồl lơh broă ờ mìng lam lơh ală broă lơh ai dơ̆ pơrlòng in di quy chế, di broă rơndap lơh, mờ gam gàr ală jơnau sồr rơcang sơndră kòp tai tàm tơngai kòp Covid-19 gơlik geh kal ke. Tàm hơ̆ geh 4 rơndap broă bơyai lơh pơrlòng ndrờm mờ 4 kấp gơlik geh kòp bơtờp dê. Pơrlòng kung gam geh lơh jat broă rơndap lơh bal bơh Bộ Giáo dục mờ Đào tạo dê, Sở kung neh geh sră nggal sồr ală kơnòm bơsram tus bal dơ̆ pơrlòng, kuang bàng sền pơrlòng mờ ală cau lơh broă tàm dơ̆ pơrlòng pal yal bè pràn kơldang să jan gah lơh sơnơm in lài 7 ngai tŭ dơ̆ pơrlòng geh lơh. Tơnơ̆ hơ̆ pơyua jơh ală jơnau yal rê hờ ală anih cih mat tus bal pơrlòng, ală cụm pơrlòng nàng mblàng git loh mờ bơsong”.

Là dùl tàm ală tiah geh khà cau pơrlòng cih mat tus bal pơrlòng jơh bơsram kấp 3 uă ngan rlau jơh gùt lơgar mờ rlau 88 rbô nă cau pơrlòng, ồng Lê Hoài Nam, Phó Kuang atbồ Sở Giáo dục mờ Đào tạo ƀòn dờng Hồ Chí Minh pà git, Sở neh ai tơlik ală sră nggal pơlam bơyai lơh pơrlòng tus jơh ală hìu bơsram tàm ƀòn dờng, ală anih pơrlòng mờ rơcang ală bơta bè phan bơna kung bè cau lơh broă nàng drơng dơ̆ pơrlòng, bulah priă tă lơh nàng drơng ai dơ̆ pơrlòng in hoàc uă rlau tài pal gàr ờdo ờdă rơcang sơndră kòp: “Bol hi kung neh geh broă rơndap lơh mờ ƀòn dờng kung tă kes priă nàng blơi phan rơcang sơndră kòp tàm 160 anih pơrlòng do, tă rlau 1 tơmàn blơi dà ràu tê, blơi chèu glòm muh mat mờ gàr tơl cơldŭ pơrlòng ndrờm geh dà ràu tê, hơ̆ sồng was khà duh să jan, lơh jat di jơnau sồr 5K”.

Tàm pơrjum pờ tơlik tơn tàm internet bè broă bơyai lơh pơrlòng jơh bơsram kấp 3 nam 2021 bơh Bộ Giáo dục mờ Đào tạo bơyai lơh mờ 63 càr, ƀòn dờng pa do, kuang đơng lam bồ Bộ Giáo dục mờ Đào tạo cih dờp bơta rơcang lài nền nòn ngan bơh ală tiah dê tàm broă rơcang bơyai lơh pơrlòng. Đơs nền bơta kuơmàng bơh dơ̆ pơrlòng dê, Thứ trưởng Bộ Giáo dục mờ Đào tạo ồng Nguyễn Hữu Độ kung sồr ală Mpồl duh broă pơrlòng rơcang lài phan bơna, kuơmàng là cau lơh broă tơl nùs nhơm niam mờ pràn jak nàng bơyai lơh pơrlòng gàr ờdo ờdă, jơh nùs mờ di quy chế: “Rơwah di cau, jàu di broă. Bol he kung gam ai kơnòl broă tờm là bơyai lơh pơrlòng ngan ngồn là song dơpă, geh cồng nha, gàr bơta ring bal den rơwah di cau lơh dùl broă kuơmàng ngan. Ală cau geh nùs nhơm niam, geh priàn jak, geh kơnòl broă, jơh nùs tàm tŭ bơyai lơh mờ kuơmàng là rơwah cau atbồ, ngan là ală hìu bơsram, anih pơrlòng, hơ̆ sồng ală kuang đơng lam bồ, kuang atbồ mpồl sền pơrlòng, kuang atbồ mpồl ai điểm pơrlòng. Mơya cau atbồ mờ song dơpă den dơ̆ pơrlòng geh lơh song dơpă sơl”.

Rơcang ai broă bơyai lơh pơrlòng jơh bơsram kấp 3 nam 2021 in, Bộ Giáo dục mờ Đào tạo bal mờ ală tiah neh jơh nùs rơcang lài, gàr di tŭ tơngai hơ pơrgon. Bulah bè hơ̆ rềp ndo, kòp Covid-19 gơlik geh ngai sơlơ kal ke. Tàm pơ dờn ală mờng chài bơh nam lài dê, Bộ Giáo dục mờ Đào tạo bal mờ ală tiah geh bơyai lơh pơrlòng jơh bơsram kấp 3 nam do jat di broă rơndap lơh, mơya mìng bơyai lơh dơ̆ pơrlòng jơh bơsram kấp 3 tàm 2 ngai, ngai 7 mờ ngai 8 nhai 7 tàm ală tiah ờdo ờdă mờ ală cau pơrlòng ờ di là cau F0, F1, F2. Ồng Mai Văn Trinh, Kuang atbồ Cục atbồ bơta niam, Bộ Giáo dục mờ Đào tạo pà git: “Tus rềp tơngai do, dilah kung gam geh ală tiah pal lơh jat jơnau sồr wàng se halà ơm yah ngài mpồl bơtiàn jat jơnau sồr bơh Thủ tướng Chính phủ dê nàng rơcang sơndră kòp Covid-19 den dơ̆ pơrlòng ngai 7 mờ ngai 8 nhai 7 tus do mìng bơyai lơh ai ală tiah ờdo ờdă mờ ai ală cau pơrlòng ờ di là cau F0, F1, F2. Bè hơ̆ ngan là Bộ Giáo dục mờ Đào tạo geh bal mờ ală tiah bơyai lơh tai pơrlòng dơ̆ 2 ai ală cau ờ hềt gơtùi pơrlòng dơ̆ 1”.

Gơ wèt mờ broă rơwah cau mut hìu bơsram đại học, cao đẳng, kuơmàng gơ wèt mờ ală cau pơrlòng rơwah mut tàm ală hìu bơsram đại học, cao đẳng mờ broă ai cồng nha dơ̆ pơrlòng jơh bơsram kấp 3 nam 2021 dê, Bộ Giáo dục mờ Đào tạo geh sồr ală hìu bơsram đại học tam gơl bè broă lam lơh, tơngai, jơnau kờñ rơwah cau bơsram nàng gàr gơnoar kuơ ai cau pơrlòng rơwah mut hìu bơsram đại học mờ broă ai cồng nha pơrlòng jơh bơsram kấp 3 nam 2021 tàm uă dơ̆ krơi is. Bộ Giáo dục mờ Đào tạo kung rơcang jơnau lùp pơrlòng ai ală dơ̆ pơrlòng krơi is nàng gàr bơta ndrờm bal bè khà kal ke kờñ gàr gơnoar kuơ ai cau pơrlòng tus bal pơrlòng tàm uă dơ̆ pơrlòng krơi is in.

Cau mblàng K’Duẩn