VOV4.K’ho - Tơnơ̆ mờ tŭ PGS.TS Nguyễn Trường Sơn, Thứ trưởng Bộ Y tế, Kuang atbồ mpồl duh broă sùm kuơ màng bơh Bộ Y tế tàm ƀòn dờng Hồ Chí Minh neh hòi jà ală cau lơh broă bal tàm gah lơh sơnơm tus bal tus tam dră mờ kòp dong kờl ƀòn dờng Hồ Chí Minh, kờp tus 6 jơ mang ngai 26 nhai 7, neh geh rơlao 2 rơbô 100 nă cau dan cih măt tus bal.

Tàm rơlao 2 rơbô 100 nă cau dan cih măt, cau tàm ƀòn dờng Hồ Chí Minh geh mờr 1 rơbô 900 nă; ală càr ndai rơlao 200 nă. Mùl màl, geh mờr 300 nă bác sĩ, 400 nă điều dưỡng, mờr 200 nă dược sĩ, gam tai là ală gah lơh broă ndai. Tŭ do, Sở Y tế ƀòn dờng Hồ Chí Minh gam ai broă rơndăp lơh tam pà 80 nă bác sĩ mờ 50 nă điều dưỡng tus hờ hìu sơnơm sơm kòp Covid-19 mờ ờ uă hìu sơnơm lơh ing ndai, ală cau lơh broă nùs nhơm dong kờl gam tai geh jun tus tàm ală hìu sơm kòp mờ ală tiah kờñ tàm ƀòn dờng.

Cau mblàng Ndong Brawl