VOV4.K’ho – Pơn jat tai pơrjum dơ\ 24, Ủy ban Thường vụ Quốc hội ai jơnau đơs bè jơnau yal sền gròi broă bơsong jơnau dan, jơnau đơs bơh cau te\ khà dê tàm pơrjum dơ\ 4 bơh Quốc hội dê mờ rơndap cih jơnau yal tơr gùm jơnau đơs, jơnau dan bơh cau te\ khà mờ làng bol dê pơyua tus pơrjum dơ\ 5 bơh Quốc hội khoá 14 dê.

Jat jơnau yal, pơrjum dơ\ 4 bơh Quốc hội dê dờp geh rlau 2 rbô jơnau đơs, jơnau dan bơh cau te\ khà dê geh tơngume gơwèt jơh ală gah bơh mpồl bơtiàn dê. Tus tu\ do, 100% ală jơnau dan ndrờm neh geh sền sơwì mờ hơ cau te\ khà in.

Bu\lah bè hơ\, cau te\ khà mờ làng bol kung gam uă bơta ờ suk bè trồ tiah lơh aniai, tam gơl trồ tiah gơlik geh kal ke ờ gơtùi git lài, digơlan lơh aniai ờ niam rlau tai tus broă lơh sa mờ rài kis bơh làng bol dê; bơta lơh tìs ală jơnau sồr bè sền gàr tiah ơm kis, ờ do ờ dă phan sa, rơcang sơndră ồs sa bơrtoh, bơta ờ niam bè nùs nhơm tàm mpồl bơtiàn, bơta cau tìs, tam lơh tam pờng tàm hìu bơnhă, tam lơh tam lah tàm hìu bơsram, lơh aniai kơnòm dềt gơlik geh kal ke.