VOV4.K’ho - Di lah kờp bơh tŭ gơtìp kòp dơ̆ poan tàm lồi nhai 3 nam do, pơn drờm mờ ală dơ̆ kòp gơtờp lài, dơ̆ gơtờp kòp do neh lơh gơrềng uă ngan, lơh aniai uă tus mờ ală bơta tàm rài kis lơh sa, mpồl bơtiàn. Khà cau gơtìp kòp Covid-19 mờ chơ̆t sùm tàm khà uă, den tàng pal geh broă tam dră mờ kòp ndrờm bal, di pal tus mờ tơl tơngai, geh tŭ là tơl tŭ. Tàm ală tŭ kal ke, tềng đăp mờ broă đơng lam bơh Đảng, broă đơng lam tơrgùm bal, ndrờm bal di pal mờ bơta mùl màl bơh Chính phủ neh dong kờl ƀòn dờng Hồ Chí Minh mờ ală càr rềp bal hờ đah jum dà lơgar, kung bè gùt lơgar neh rơhời geh sền gròi kòp gơtờp. Uă tiah gơtìp hoàc huơr uă ngan neh mŭt tàm tơngai brồ wơl. Bŭ lah tềng đăp gam uă kal ke, tài kòp gơtờp pơn jăt tai gơtìp kal ke, khà gơtờp mhar, ni sơna, ờ git lài, mơya gùt lơgar gam lơh ngan “Dùl nùs – Dùl nhơm sơrlèt mờ kòp gơtờp”.

Sền tơrgùm bal bè bơta gơtờp bơh kòp Covid-19 dơ̆ poan, ờ mìng tàm lơgar Việt Nam mờ ală lơgar tàm dunia ndrờm gơtìp aniai uă ngan. Broă tam gơl Delta jàng lah ờ geh bơta lơi kơrian geh, neh, gam lơh tơlòng, pơhìn tus mờ cồng nha tam dră mờ kòp bơh ală lơgar dê, tàm hơ̆ geh bal ală lơgar dờng bè broă lơh sa, geh gah lơh sơnơm pa pràn bè lơgar Mỹ kung gam geh tus git nđờ rơhiang nă cau gơtìp chơ̆t pah ngai tài kòp Covid-19. Lơgar Anh pah ngai geh rơlao 30 rơbô nă cau gơtìp, lơgar Nga rơlao 25 rơbô nă cau gơtìp... Geh uă lơgar bè Australia ha là Singapore... jăt broă lơh zero Covid geh cồng nha uă nhai do, tŭ do kung mhar gơtìp mờ tam gơl să Delta lơh gơbàn sơl.

Tàm bơta gơtờp uă geh măt sơnđan tam gal să Delta, lơgar Việt Nam kung ờ di là ờ geh. Tŭ khà virus uă rơlao 300 dơ̆ mờ ală tam gơl să lài mờ hơ̆, broă gơtờp gơlik geh mhar mìng bơh 2, 3 dơ̆ tă nhơm. Tus lồi poh lài, gùt lơgar geh gŏ rơlao 850 rơbô nă cau gơtờp kòp. Covid-19 neh lơh rơlao 20 rơbô nă cau gơtìp chơ̆t. Broă kham, sơm kòp kung kal ke ngan sơl. Broă lơh sơnơm gùt lơgar tàm ală ngai bè ờs neh gal ir cau, tŭ do sơlơ ờ tơl ngan cau lơh broă rơlao jơh. Tàm ală tiah gơtìp kòp, tàm ală tiah lơi geh ơnàng ndrờm geh ngui jơh nàng mhar lơh hìu sơnơm ing... bŭ lah bè hơ̆, mơya kung gam ờ tơl sơl jăt mờ khà cau kòp gơguh git ndrờm rơbô nă, geh tŭ git nđờ jơ̆t rơbô nă cau pah ngai. Dà kơl hề, dà măt bơh ală mpồl cau lơh broă tàm tiah sơnrờp gơlik sùm tài tam gơl să Delta lơh cau gơtìp kòp jroă mhar ngan. Uă cau ngòt rơngơ̆t, moăt jrùng tềng đăp mờ broă ni sơna chơ̆t bơh cau pròc mhàm: “Dùl nă añ tàm hìu 3 nă cau gơtìp kòp Covid, bơklao añ ñjơ̆ tus 78 kĭ, mơya kung ờ jai ơ̆t sơl”.

Lơh broă bal bŭ lah ngai ha là mang mờ làng bol tàm rơlao 6 nhai lơh ngan tam dră mờ kòp gơtờp, Chính phủ neh hòi jà tơrgùm bơta pràn tàm broă lơh do. Thủ tướng Chính phủ ồng Phạm Minh Chính neh uă dơ̆ đơs tờm, pal tơrgùm jơh bơta pràn, sền gàr màng kis làng bol. Sơlơ kal ke, glar bòl sơlơ pal tam klăc bal nàng jòi geh broă lơh di pal: “Pơn dềt să, sơrmah sơrmàl, iăt jơnau đơs, rơwah broă lơh niam ngan nàng bơyai lơh, hòi jà bơta pràn bơh ală mpồl lơh broă chính trị mờ gùt làng bol nàng tam dră mờ kòp, ring niam ală bơta. Sền broă kal ke, tơlòng là bơta tờm nàng sơrlèt, lơh ngan, ai geh mờ gơs dờng pràn. Pal rơlĕ, lơh sùm, kơ̆ nùs nàng lơh jăt geh ală jơnau kờñ, broă lơh neh geh ai, mơya ndrờm bal, bơceh lơh, ai bơh broă lơh mùl màl, lơh broă ndang mờ ai geh broă lơh mờng chài ndang, bơtơl, lơh gơs rơhời, bañ lơh jal ir”.

Tàm kòp dơ̆ poan gơtìp kal ke ngan, ờ jăt mờ kơrnoăt mờ ờ hềt tŭ lơi geh. Nàng ai geh ală broă lơh, kơrnoăt kuơ màng, Chính phủ sùm pal lơh jăt nền nòn bơta mùl màl. Tàm tŭ kòp gơtìp kal ke, Thủ tướng bal mờ ală kuang bàng tàm Chính phủ neh uă dơ̆ tus tàm tiah gơtìp kòp ƀòn dờng Hồ Chí Minh, càr Bình Dương… sền gròi, đơng lam broă tam dră mờ kòp. Mpồl đơng lam Dà lơgar rơcang sơndră mờ kòp Covid-19 kung neh geh uă dơ̆ lơh broă pờ tơlik tàm internet pơgồp bal mờ git nđờ rơhiang quận, kơnhoàl, thị xã, tus git nđờ rơbô anih pờ tàm ală xã, sơnah ƀòn, thị trấn, bơh tŭ hơ̆ nàng sền gròi mờ đơng lam nền nòn tus tàm ală tiah lơh jăt bal. Broă đơng lam rơcang sơndră mờ kòp geh lơh sùm, di pal mờ tềm pềr. Kung là dơ̆ sơnrờp jăt jơnau đơng lam bơh Thủ tướng Chính phủ ai xã, sơnah ƀòn lơh tiah tờm nàng tàm dră mờ kòp, geh git nđờ jơ̆t rơbô “mpồl covid mpồl bơtiàn” geh crơng gơs, bŭ lah trồ tơngai duh ha là trồ mìu kung ndrờm ơm gròi sền tàm ală anih sền gàr tiah tơlir ƀòn ơm kis, tam cah is mờ ală tiah di gơlan gơtìp kòp. Hìu sơnơm tàm ală tiah kung tơnguh gơnoar, bơta pràn bơh să tờm. Mờ broă lơh “hìu sơnơm ntrờn”, ală hìu sơnơm sơnah ƀòn, xã neh ai broă lơh sơnơm tus gờñ mờ tơl nă làng bol, tơl ƀòn ơm kis, tơl hìu măi, xí nghiệp. Bí thư tỉnh ủy Bình Dương ồng Nguyễn Văn Lợi pà git: “Tŭ gŏ cau F0, di lah công nhân cau lơi neh cit 2 ding, 1 ding sơnơm vaccine den ai tam cah is tàm hìu nàng hùc sơnơm, sền gròi tŭ gơtìp jroă den cèng. He wàng se, kơrian dềt, hơ̆ sồng ƀồm sơnơm lơh kloh vi khuẩn, bơsong F0, F1 tơnơ̆ mờ hơ̆ 1, 2 ngai ai lơh broă wơl bè ờs, gam bơsong ờ uă cau gơtìp F0 tơl mpồng hìu măi là ờ di bè ờs. Do là kơnòl bơh hìu sơnơm ntrờn dê”.

Tềng đăp mờ broă đơng lam bơh Chính phủ, dùl broă dong kờl dờng ờ hềt tŭ lơi geh ai ƀòn dờng Hồ Chí Minh mờ ală càr hờ đah jum dà lơgar in tam dră mờ kòp neh geh tàm gùt lơgar. Tơl càr, ƀòn dờng hòi jà git nđờ rơhiang nă y, bác sĩ, cau lơh sơnơm tus tàm ƀòn dờng Hồ Chí Minh. Ală mpồl lơh broă tàm tiah sơnrờp tam dră mờ kòp, mpồl covid-19 mpồl bơtìan, ală mpồl lơh broă, ală cau lơh broă nùs nhơm dong kờl ờ kờp cau dờng, cau kơnòm, tơnguh nùs nhơm tam klăc bal gùt jơi bơtiàn kòn cau, tŭ lơi kung rơcang lơh ngan tài bơta pràn kơl dang să jan làng bol, tài bơta kuơ dà lơgar… Git nđờ jơ̆t rơbô nă y, bác sĩ, cau lơh sơnơm, ơruh pơnu, cau bơsram dờng neh lòt tam dră mờ kòp mờ nùs nhơm ờ tŭ lơi kơlôi.

Nùs nhơm tam klăc bal làng bol geh ai gŏ di tŭ, tơnguh geh cồng nha niam. Tềng đăp mờ broă đơng lam pràn kơl dang bơh Chính phủ, bộ, gah lơh broă geh gơnoar dà lơgar bal mờ ală tiah, kòp Covid-19 tàm gùt lơgar neh rơhời geh sền gròi. Tơnơ̆ mờ uă nhai tam cah ngài, rùp rài, rài kis bè ờs pa neh geh wơl tàm uă càr, ƀòn dờng bơh đah tô tus đah jum dà lơgar.

Cau cih Chu Thúy Ngà- Cau mblàng Ndong Brawl