VOV4.K’ho- Mìng tàm pơgap 1 poh, ƀòn dờng Buôn Ma Thuột, càr Dăk Lăk gŏ sùm gĭt nđờ jơ̆t nă cau kòp tàm mpồl bơtiàn ờ gĭt loh bơtờp kòp bơh lơi, geh broă ntrờn, lòt rê kal ke. Pal sền gròi ngan là tiah kòp pa sền gŏ tàm xã Cư Êbur mờ 17 nă cau kòp.

Anih gròi sền kòp tàm ƀòn Ea Bông

Tềng đap bơta gơlik geh kal ke bơh kòp Covid-19 dê, ală mpồl lơh broă geh gơnoar bơh ƀòn dờng Buôn Ma Thuột neh sơr băc mhar cang tiah, jòi gĭt tiah lòt rê mờ wàng se tàm ală tiah geh gơrềng. Bơh mho ngai 22/8 xã Cư Êbur neh wàng se jơh gùt ƀòn Ea Bông bal mờ 10 anih gròi sền kòp. Mơkung lơh test mhar ai làng bol in. Ngai 23/8, cồng nha xét nghiệm tàm khà rlau 1 rơbô 500 mẫu test mhar tàm ƀòn Ea Bông, geh 17 nă cau bơtờp mờ virus Sars CoV-2. Tơnơ̆ tŭ geh cồng nha, tàm ngai 23/8, Ủy ban Nhân dân ƀòn dờng Buôn Ma Thuột neh ai gơnoar ngui Chỉ thị sồ 16 tàm ù tiah jơh gùt xã Cư Êbur  dê. Bè hơ̆, mìng tàm pơgap 8 ngai, bơh ngai 16 tus ngai 23/8, ƀòn dờng Buôn Ma Thuột neh sền gŏ 28 nă cau kòp Covid-19 tàm 4 tiah kòp tàm mpồl bơtiàn.

Cau mblàng K’Hạnh