VOV4.K’ho- Tàm dơ̆ lơh broă drim ngai 23/4 mờ ƀòn dờng Hồ Chí Minh bè broă lơh rơcang sơndră kòp Covid-19, Phó Thủ tướng ồng Vũ Đức Đam sồr ală mpồl lơh broă sơlơ lòt sền tàm dơ̆ ơm rlô chờ mờr tus, sền gròi cau mut tàm lơgar he tìs mờ adat boh lam kung bè broă pơn chèu glòm muh mat tàm tiah geh gal cau nàng kơryan jơnau pơhìn bơtờp kòp.

Đơs tàm pơrjum, Phó Thủ tướng ồng Vũ Đức Đam đơs là, ƀòn dờng Hồ Chí Minh neh sền gròi kòp Covid-19 niam ngan bal mờ uă jơnau bơceh pa lam lài tàm gùt lơgar. Bulah bè hơ̆, poh pa do, tiah châu Á gơguh 34% khà cau bơtờp kòp Covid-19, ală lơgar tàm tiah do ndrờm gam tàm bơta gơguh uă cau kòp, ƀòn dờng Hồ Chí Minh là tiah geh jơnau pơhìn dờng ngan, làng bol tơrgùm rê uă, bè hơ̆ den tàng pal pơn jat tai sền gròi nền nòn, ngan là gơwèt tus mờ ală cau mut tàm lơgar he bơh lơgar ndai. Phó Thủ tướng sồr pal sơlơ lòt sền, sền gròi cau mut tàm lơgar he tìs mờ adat boh lam kung bè broă pơn chèu glòm muh mat tàm tiah geh gal cau nàng kơryan jơnau pơhìn bơtờp kòp.

Cau mblàng K’Duẩn