VOV4.K’ho- Drim ngai 06/12, tàm Hìu lơh broă Quốc hội, Ủy ban Mpồl bơtiàn bơh Quốc hội dê bơyai lơh pơrjum gùt mpồl dơ̆ 5 nàng sền sơ wì sră yal bơh Chính phủ dê bè 2, 3 cơ chế, broă lơh kuơmàng, broă ai lơh lài, broă lơh krơi is tàm rơcang sơndră kòp Covid-19. Phó Chủ tịch Thường trực Quốc hội ồng Trần Thanh Mẫn neh tus bal pơrjum. Sền sơ wì sră yal bơh Chính phủ dê, ală kuang bàng sồr lơh loh kơnau cih bè broă cau lơh broă tus bal cit sơnơm vaccine, xét nghiệm, gròi sền cau bơtờp kòp Covid-19.

Tàm pơrjum, Phó Chủ tịch Quốc hội ồng Trần Thanh Mẫn sồr pơn jat tai lơh loh broă bơsir bơh jơnau rơcang cih Nghị quyết dê mìng tơrgùm crih ală cơ chế, broă lơh kuơmàng, broă ai lơh lài, broă lơh krơi is bè rơcang sơndră kòp Covid-19 krơi mờ jơnau cih bơh adat boh lam dê halà ờ hềt geh adat boh lam gam lơh jat tŭ do cih. Pơn jat tai kờp sền wơl jơh ală cơ chế, broă lơh geh đơs tàm jơnau rơcang cih Nghị quyết nàng yal mờ Ủy ban Thường vụ Quốc hội.

Cau mblàng K’Duẩn