VOV4.K’ho- Gơrềng tus broă tơnguh giă kit xét nghiệp kòp Kovid-19 bơh Kông ty Kổ phần Kông nghệ Việt Á (Kông ty Việt Á) dê, drim ngai 21/12, Kwang ătbồ Sở Y tế càr Dăk Lăk ồng Nay Phi La đơs nền, càr neh blơi rlau 20 rbô kit xét nghiệm kòp Kovid-19 bơh Kông ty do dê, giă 370 rbô đong dùl kit. Ală tŭ blơi geh lơh jăt di jơnau sồr, ờ geh jơnau ờ niam.

Bè ală broă lơh sră pơ àr blơi, ồng Nay Phi La đơs nền: Broă blơi kit xét nghiệm kòp Kovid-19 tàm càr ndrờm geh CDC lơh broă rơndăp lơh. Pơn jăt hơ̆, mpồl do jun yal tus Sở Y tế càr in tơnơ̆ hơ̆ Sở jun yal mờ Ủy ƀan Ñân zân càr Dăk Lăk sền swì kĭ. Tơnơ̆ hơ̆, CDC Dăk Lăk apah dùl mpồl lơh broă is lùp sền nền giă bơnah phan blơi tơnơ̆ hơ̆ jun yal tus Sở Tài cíñ in sền swì nền mờ kĭ. Pơn jăt hơ̆ sră nggal geh jun yal tus Sở Kế hoạch mờ Đầu tư càr sền swì wơl ală broă lơh tơnơ̆ hơ̆ den CDC hơ̆ sồng blơi. Ală broă lơh dipal jăt bơta rơndăp tăp sèng mờ jơnau cih gam ngui tŭ do bơh kơrnoăt boh lam dê.

Cau mblàng Lơ Mu K’Yến