VOV4.K’ho- Kung tàm dơ\ pơrjum dơ\ 5, Quốc hội khoá 14 đơs bè Rơndăp lơh Adat Tam phan. Bàr pe nă kuang bàng đơs là, rơndăp lơh Adat kờ` pal cih niam atbồ bơh broă sơntìl chi tam nàng lơh gơlik ală phan bơna pràn gơcèng mat kă bro lơgar Việt Nam dê.

Bơnah tam gơl bơh rơndăp lơh Adat do dê kờ` pal kơlôi sơnơng bơtơl jơnau cih gơ wèt tus mờ broă ngui sơnơm sền gàr phan tam, dà tuh tàm ală tu\ tam phan nàng gròi sền tơl jơh gàr niam ờdo ờdă phan sa mờ sền gàr tiah ơm kis. Ồng Y Khut Niê, mpồl kuang bàng Quốc hội càr Dak Lak, đơs bè do:

Jat a` den bơnah tam gơl pal tam gơl tàm broă ù tiah mờ dà nàng drơng ai broă lơh tam phan, broă lơh gơlik phan, broă lơh prăp gàr phan bơna tơnơ\ tu\ tơnhàu lơh geh bơta niam tàm ală tu\ lơh. Mờ tàm ală tu\ tam phan kung kuơmàng ngan. Dilah phơng sih niam, sơntìl niam mơya tàm ală tu\ tam ờ niam den ngan ngồn là geh ờ lơh geh bơta niam ngan ngồn.

Tơngume do dilah lơh geh niam den geh dong làng bol tàm tiah sar lơgar ngài mờ broă tam phan gơ wèt mờ broă tam phan bơh Việt Nam dê niam rlau, lơh geh bơta niam phan lơh gơs bơh sươn sre Việt Nam dê.

Cau mblàng Lơ Mu K’Yến