VOV4.K’ho- Ƀộ Y tế pa geh sră nggal pơyua Kwang atbồ Mpồl đơng lam rơcang sơndră kòp Kovid-19 mờ Củ tịc Ủy ƀan Ñân zân ală càr, ƀòn dờng bè sơlơ tơnguh ală broă lơh rơcang sơndră kòp bơtờp tềng đap jơi tam gơl să Omicron. Tàm Việt Nam neh git gŏ ală cau bơtờp jơi tam gơl să Omicron tàm 3 tiah đah tô dà lơgar, đah jum dà lơgar, tàm gùl dà lơgar ndrờm là ală cau mut bơh lơgar ndai neh geh gròi sền, tam cah di tŭ.

Tàm tŭ tơngai jơi tam gơl să Omicron digơlan mut mờ bơtờp mhar ngan, Ƀộ Y tế sồr ală càr, ƀòn dờng đơng lam kràñ cê, jơh nùs, sơlơ tơnguh ală broă lơh rơcang sơndră kòp Kovid-19, rơcang lài sơndră jơi tam gơl să Omicron; rơcang lài bơt bơtàu ală jơnau rơcang, broă rơndap lơh lài nàng rơcang lài sơndră mờ ală broă gơlik geh bơh kòp Kovid-19 dê tàm ù tiah ƀòn lơgar he, tơnguh pràn jak mpồl lơh sơnơm jat jơnau đơs 4 tơn tàm dùl anih; sơlơ gròi sền, atbồ ală cau mut tàm lơgar he bơh lơgar ndai. Ală tiah pal sơlơ tơnguh broă lơh mblàng yal jơnau tơnguh jơnau rơcang ngac bơh làng bol dê tềng đap jơi tam gơl să Omicron, ờ tơrgùm gal cau dilah ờ geh broă kuơmàng.

Cau mblàng K’Duẩn