VOV4.K’ho - Drim do (22/11), tàm hìu Quốc hội, sơn đờm broă lơh pơrjum dơ̆ 5 bơh Ủy ban Thường vụ Quốc hội (TVQH). Pơrjum geh bơyai lơh tàm 2 ngai, tàm hơ̆, Ủy ban Thường vụ Quốc hội pơgồp jơnau đơs tàm uă tơngu me kuơ màng.

Bè broă bơ̆t bơtàu adăt boh lam, Ủy ban TVQH pơgồp jơnau đơs tàm rơndăp broă cih Nghị quyết bơh Ủy ban TVQH mblàng ờ uă bơta tàm Adăt Hình sự. Pơgồp jơnau đơs bè jơnau sồr bơh Chính phủ bè broă bơtơl 02 rơndăp broă adăt tàm Broă bơ̆t bơtàu adăt boh lam, kơrnoăt sồr nam 2022, hơ̆ là Adăt tam gơl, bơtơl ờ uă bơta tàm Adăt Tần số vô tuyến điện; Adăt kham kòp, sơm kòp (tam gơl); mờ pơgồp jơnau đơs bè broă kĭ Hiệp định Bảo hiểm xã hội đah Chính phủ lơgar Việt Nam mờ Chính phủ lơgar Hàn Quốc. Tàm pơrjum do, Ủy ban TVQH kung sền wơl jơnau yal bè broă lơh jăt khà priă atbồ ngui Kes priă bảo hiểm xã hội tơngai bơh nam 2019 tus 2021 mờ kơrnoăt tă priă atbồ Kes priă bảo hiểm xã hội tơngai bơh nam 2022 tus 2024. Sền wơl jơnau yal cồng nha sền gròi sră nggal adăt boh lam gơwèt gah broă bơh Hội đồng Dân tộc, ală Ủy ban bơh Quốc hội.

Cau mblàng Ndong Brawl