VOV4.K’ho - Drim òr (14/12), tàm hìu pơrjum Diên Hồng, hìu Kuốk hội, Ƀộ Cíñ trị, Ƀan Ƀí thư bơyai lơh pơrjum broă lơh bal mờ lơgar ndai gùt lơgar lơh jăt Nghị quyết Pơrjum dờng dơ̆ 13 Đảng dê jăt broă lơh pơrjum tơn pơgồp bal mờ pờ tơlik tàm internet.

Tổng Ƀí thư ồng Nguyễn Phú Trọng tus pơrjum mờ geh jơnau đơng lam kuơ màng tàm pơrjum. Do là pơrjum lơh broă bal mờ lơgar ndai gùt lơgar sơnrờp ngan geh Ƀộ Cíñ trị, Ƀan Ƀí thư đơng lam tơn bơyai lơh nàng cri bơyai bè broă lơh bal mờ lơgar ndai Đảng, broă lơh bal mờ lơgar ndai Dà lơgar, broă lơh bal mờ lơgar ndai làng bol bal mờ broă lơh bal mờ lơgar ndai jơh gùt mpồl lơh broă cíñ trị. Pơrjum là dơ̆ nàng gùt gah lơh broă bal mờ lơgar ndai sền wơl broă lơh jăt mờ cri bơyai ală broă nàng lơh geh cồng nha kơnòl lơh broă bal mờ lơgar ndai tờm tàm ală nam tus.

Do kung là dơ̆ nàng ală kấp, ală gah lơh broă, ală càr, ƀòn dờng bal mờ mpồl kuang bàng lơh broă bal mờ lơgar ndai git tơl mờ jăk chài rơlao bè bơta, bơngă bơh dà lơgar he dê tàm tiah do mờ tàm dunia; bơngă, bơta kuơ mờ bơta kuơ màng bơh broă lơh bal mờ lơgar ndai tơrgùm bal broă lơh jŏ jòng bơ̆t bơtàu mờ sền gàr dà lơgar, ai geh nùs nhơm pa, broă lơh ngan pa mờ bơta pràn pa ai jơh gùt mpồl lơh broă cíñ trị, ală kấp, ală gah lơh broă, tơl mpồl lơh broă bal mờ tơl nă cau tàm broă lơh bal mờ lơgar ndai.

Cau mblàng Ndong Brawl