VOV4.K’ho - Drim òr (04/01), tàm Hìu Quôk hội, geh bơyai lơh sơn đờm pơrjum ni sơna bơh Quốk hội khoă 15 jăt broă lơh pờ tơlik tàm internet tus 62 anih tàm ală càr, ƀòn dờng.

Lài mờ sơn đờm pơrjum, ală kwang bàng Quôk hội tàm anih pờ sơnrờp Hìu Quốk hội neh tus pơdơng bơkào, mŭt tàm gơlang ies Củ tịc Hồ Chí Minh, đơs tàm sơn đờm pơrjum, Củ tịc Quôk hội ồng Vương Đình Huệ neh ai gùng dà ală tơngu me kuơ màng nàng ală kwang bàng Quôk hội tơrgùm cri bơyai, hơ̆ là: sền wơl ring bal Nghị quyết bè broă lơh nam priă jền, priă nàng dong kờl lơh jăt jơnau kờñ brồ guh mờ tơnguh bơtàu lơh sa mpồl bơtiàn; sền wơl, ring bal Nghị quyết bè gùng dà bơcri priă lơh rơndăp broă bơ̆t bơtàu broă lơh gùng tàm ù gờl ntoăt jờl đah tô-đah jum hờ đah măt tơngai lik tơngai bơh nam 2021 tus 2025. Tàm pơrjum do, Quôk hội kung sền wơl, ring bal rơndăp broă adăt tam gơl, bơtơl ờ uă bơta tàm adăt bơcri priă dà lơgar, Adăt bơcri priă jăt broă lơh bal đah dà lơgar bal mờ cau dùl nă să lơh is, Adăt bơcri priă, adăt đấu thầu, adăt ồs đèng, adăt mpồl lơh sa kă bro, adăt tă dia ngui sa kuơ màng mờ adăt lơh jăt broă cah rơña làng bol. Tơnơ̆ mờ pơrjum sơn đờm, Quôk hội neh iăt Cíñ phủ yal jơnau yal bơh 3 rơndăp broă cih nghị quyết mờ 1 rơndăp broă adăt.

Cau mblàng Ndong Brawl