VOV4.K’ho- Mho ngai 27/4, tàm broă lơh bơh Mpồl kă bro dunia dê (WTO), dơ̆ kờp sền wơl Gùng dà broă lơh kơrnoat boh lam kă bro dơ̆ 2 bơh lơgar Việt Nam dê geh Bộ Công thương bơyai lơh bơh broă lơh pờ tơlik tơn tàm internet.

Ala măt Mpồl kuang bàng Việt Nam, ồng Trần Quốc Khánh Thứ trưởng Bộ Công thương Việt Nam neh yal jơh ală cồng nha niam ngan mờ pơnrơ ngan bơh lơgar Việt Nam dê kờp bơh dơ̆ kờp sền gùng dà broă lơh kơrnoat boh lam kă bro dơ̆ sơnrờp tàm nam 2013, mơkung đơs sùm bơta lơh ngan jơh nùs pơn jăt tai lơh ală broă lơh mŭt gơrờm bal tơl làm, jrô ơnàng làm uă, lơh niam wơl lơh sa kung bè lơh jăt niam ală jơnau hơ pơrgon dunia.

Tàm dơ̆ pơrjum, ală cau ala măt bơh ală lơgar tàm mpồl WTO dê kung neh cih dờp bơta bơtàu tơnguh bơh rài lơh sa lơgar Việt Nam dê, mơkung geh ală jơnau lùp nàng cau ala măt đah lơgar Việt Nam dê hơ, bè; tiah ơm kis lơh sa lơgar Việt Nam dê, kơrnoat kă bro mờ bơcri priă, ală gùng dà broă lơh kơrnoat boh lam kă bro bè jơnau cih sền gròi tă dia phan tăc blơi mờ lơgar ndai, dia tăc blơi phan mờ lơgar ndai dong kờl, rơcăng gàr lài kă bro, geh gơnoar ngui bồ tơngoh jak, blơi prăp chính phủ, gùng dà broă lơh kơrnoat boh lam bơtàu tơnguh bàr pe gah broă kuơmàng, bè lơh broă sa sươn sre, phan tàm dà, ồs đèng, lơh sa mờ măy mok, gùng lòt pơndiang phan, drơng broă viễn thông...

Cau mblàng Lơ Mu K’Yến