VOV4.K’ho- Drim ngai 16/4, tàm hìu duh broă Tỉnh ủy Gia Lai, Ban Chấp hành Đảng bộ càr Gia Lai khoá XVI neh bơyai lơh Pơrjum dơ̆ 3 pờ ơnàng nàng sền swì broă lơh jăt kơnòl broă broă lơh qúy I, lam lơh gùng dà, broă lơh mờ kơnòl broă qúy II nam 2021. Pơrjum dơ̆ do gam tơrgùm cribơyai ai jơnau đơs gơwèt mờ rơcăng cih Nghị quyết bơh Tỉnh ủy dê bè “Bơ̆t bơtàu, tơnguh uă cồng nha mpồl kuang bàng bơh càr Gia Lai dê tơl nùs nhơm niam, pràn jak mờ bơngă pin dờn, ndrờm pa mờ kơnòl broă”. Do là broă lơh tờm dơ̆ sơnrờp tàm Nghị quyết Pơrjum dờng cau ala măt Đảng bộ càr dơ̆ XVI, tơngai lơh broă bơh nam 2020- 2025.

Đơs mŭt pơrjum, ồng Hồ Văn Niên Bí thư Tỉnh ủy neh yal dùl êt cồng nha mờ song dơ pă sền swì wơl bàr pe bơta gam gơkòl, ờ hềt pràn jak; sồr ală cau lòt pơrjum tơrgùm sền swì, lơh loh làng jơnau bơh tài gơbàn bơh ală jơnau gam gơkòl, bơta ờ hềt pràn jak hơ̆ dê; mơkung ai jơnau bơsram mờng chài, dan geh ală broă lơh bơsong nàng lam lơh jăt niam rlau kơnòl broă qúy II, lơh bè lơi nàng lơh jăt geh cồng nha kơnòl broă bơtàu tơnguh lơh sa- mpồl bơtiàn nam 2021.

Cau mblàng Lơ Mu K’Yến