VOV4.K’ho- Jat jơnau yal sră cih mat sơñio khà bơta pràn jak tàm pơrlòng kấp càr PCI nam 2020 bơh Phòng Thương mại Việt Nam dê pa yal, 4 tàm 5 càr tàm tiah Tây Nguyên neh gơmù điềm pơndrờm dùl tŭ bal mờ nam 2019. 3 càr tàm tiah Tây Nguyên tàm mpồl gơguh đau bơh nam 2019 dê, geh 2 càr gơmù tàm mpồl dimơ. 3 càr tàm tiah Tây Nguyên kờp jơh khà điềm bơta pràn jak tàm pơrlòng uă, gơwèt mpồl gơguh đau nam 2019 là Lâm Đồng, Gia Lai mờ Dak Lak, den nam do, mìng geh Lâm Đồng geh gơkờn tàm mpồl do, bulah neh gơmù 1, 8 điềm. Dak Lak mờ Gia Lai mờ khà gơmù dơ̆ dùl dơ̆ là 1,59 mờ 2,22 điềm, neh gơmù tàm mpồl di mơ. Gơwèt mờ Gia Lai, jơnau tờm gơbàn là tài bơh Sơñio khà drơng broă ala dong kờl mpồl lơh sa kă bro gơtìp gơmù mờ Sơñio khà bơto bơtê cau lơh broă gơmù.

Kung jat jơnau yal sơñio khà bơta pràn jak tàm pơrlòng kấp càr nam 2020, Tây Nguyên ờ geh càr lơi geh ơm tàm mpồl “lơyah dimơ đau”, mơya geh 2 càr ơm tàm mpồl lồi dŭt bơh “mpồl dimơ” dê. Tàm hơ̆, càr Dak Nông, mìng dùl ngan tàm Tây Nguyên gơguh điềm pơndrờm mờ nam 2019, mờ khà gơguh 1,46 điềm, mơya kung gam ơm lồi dŭt tàm tiah do mờ geh ơm tàm tiah mờr lồi dŭt tàm mpồl dimơ bơh gùt lơgar dê.

Cau mblàng K’Hạnh