VOV4.K’ho- Mho ngai 28/09, Phó Thủ tướng Chính phủ ồng Vũ Đức Đam, Mpồl lơh broă dờng màng bơh Chính phủ dê lơh jăt broă lơh rơcăng sơndră kòp Covid-19 pơrjum pờ tơn tàm internet mờ 19 càr, ƀòn dờng tiah đah jum dà lơgar, bàr pe càr tiah Tây Nguyên, tiah đah jum tàm gùl lơgar bè broă pơn jăt tai pơgồp bal niam nàng gròi sền kòp bơtờp.

 Phó Thủ tướng ồng Vũ Đức Đam bal mờ Mpồl lơh broă pơrjum mờ 19 càr, ƀòn dờng tiah đah jum dà lơgar

Tàm dơ̆ pơrjum, ala măt ƀòn dờng Hồ Chí Minh mờ ală càr: Bình Dương, Đồng Nai, Long An kơ̆p kờñ rò cau lơh phan tàm ală càr dê wơl tus wơl lơh broă; mơkung sồr cau lơh broă gam ơm tàm ală tiah do pơn jăt tai ơm wơl. Ală tiah do hơ sền gàr ờdo ờdă rài kis mpồl bơtiàn, cĭt vaccine ai làng bol in mờ gờñ lơh wơl broă lơh sa, lơh gơlik broă lơh broă sa. Kuang đơng lam bồ ală tiah do gam đơs nền tai sùm lơh broă bal, pơgồp bal niam mờ ƀòn dờng Hồ Chí Minh, Bình Dương, Đồng Nai, Long An tàm broă rơcăng sơndră kòp. Jăt ala măt Bộ Y tế dê đơs, bulah ƀòn dờng Hồ Chí Minh, ală càr: Bình Dương, Đồng Nai, Long An geh khà cĭt vaccine ding dơ̆ dùl uă ngan mơya cau neh geh cĭt kung gam digơlan gơtìp bơtờp kòp mờ lơh bơtờp ai cau ndai in. Den tàng bè hơ̆, broă lòt rê bơh làng bol tàm ƀòn dờng Hồ Chí Minh, ală càr: Long An, Bình Dương, Đồng Nai dê rê hờ ală tiah ndai kung gam pal gròi sền, ai ơm yah ngài kràñ cê jăt jơnau sồr.

Cau mblàng Lơ Mu K’Yến